Qoʻshimcha funksionallar
-
Tungi ko‘rinish
Toshkent havosida RM2,5 me’yordan 1,6 marta yuqori qayd etildi
2025 yil 28 noyabr kuni soat 09:00 holatiga ko‘ra olingan monitoring ma’lumotlariga ko‘ra, Toshkent shahri atmosfera havosida RM2,5 mayda dispersli zarrachalar miqdori ruxsat etilgan me’yordan 1,6 marta yuqori bo‘ldi. Mutaxassislar bu holatga havo haroratining keskin o‘zgarishi va inversiya jarayoni sabab bo‘layotganini ta’kidlamoqda.
Foto: Kun.uz
Atmosfera havosi ifloslanishini monitoring qilish bo‘yicha avtomatik stansiyalar 2025 yil 28 noyabr kuni soat 09:00 da Toshkent shahri havo sifati ko‘rsatkichlarini yangiladi.
Ma’lumotlarga ko‘ra:
- RM10 mayda dispersli zarrachalar miqdori 166 mkg/m³ ni tashkil etdi va ruxsat etilgan me’yor – 300 mkg/m³ dan oshmadi;
- RM2,5 mayda dispersli zarrachalar miqdori esa 99,5 mkg/m³ darajada qayd etildi, bu belgilangan me’yor – 60 mkg/m³ dan 1,6 marta yuqoridir.
Ta’kidlanishicha, ko‘rsatkichlarning oshishiga havo haroratidagi keskin o‘zgarish ham ta’sir ko‘rsatmoqda. Haroratning tez o‘zgarishi natijasida atmosferada inversiya jarayoni yuzaga keladi. Bu esa havoning pastki qatlamlarida mayda zarrachalar to‘planishiga, ularning atmosfera havosidagi konsentratsiyasi oshishiga sabab bo‘ladi.
Mutaxassislar aholidan bunday kunlarda, ayniqsa, yurak-qon tomir va nafas yo‘llari xastaligi bor shaxslardan imkoni boricha ochiq havoda uzoq vaqt qolmaslikni, jismoniy yuklamalarni cheklashni va ehtiyojga qarab himoya niqoblaridan foydalanishni tavsiya etmoqda.
Toshkent shahri atmosfera havosi holati bo‘yicha monitoring ishlari davom ettirilmoqda.
