Umerov Bryusselda Putin va Uitkoff uchrashuvini muhokama qildi

Ukraina Milliy xavfsizlik va mudofaa kengashi kotibi Rustem Umerov 3 dekabr kuni Bryusselda Yevropadagi yetakchilarning xavfsizlik bo‘yicha maslahatchilari bilan uchrashdi. Bu haqda Ukraina prezidenti Volodimir Zelenskiy X ijtimoiy tarmog‘ida ma’lum qildi.

Zelenskiyning tushuntirishicha, Umerov Ukraina Qurolli kuchlari Bosh shtabi rahbari Andrey Gnatov bilan birga «Moskvada AQSh vakillarining kechagi aloqalaridan so‘ng ma’lum bo‘lgan narsalar haqida Yevropadagi hamkasblarini xabardor qildi, shuningdek zarur xavfsizlik arxitekturasining Yevropa qismini muhokama qildi».

Shundan keyin Ukraina vakillari AQShga jo‘nab, u yerda AQSh prezidentining maxsus vakili Stiven Uitkoff va Trampning kuyovi Jared Kushner bilan uchrashadi. Suhbat mavzusi — Kremlning muzokara pozitsiyasi va urushni tugatishga oid Oq uy rejasi bo‘ladi.

2 dekabr kuni Rossiya prezidenti Vladimir Putin Ukrainadagi urushni to‘xtatish variantlarini muhokama qilish uchun Moskvada Stiven Uitkoff va Jared Kushner bilan uchrashdi.

Uchrashuv yakunlari haqida Putin yordamchisi Yuriy Ushakov ma’lumot berdi. Uning so‘zlariga ko‘ra, tomonlar kelishuvga erisha olmagan. U uchrashuv mazmunini oshkor qilishdan bosh tortdi, «butunlay yopiq, maxfiy» suhbat bo‘lganini aytdi, ammo Vladimir Putin Vashington taklif qilgan «hududiy masalalarga oid qator takliflarga tanqidiy, hatto salbiy munosabat bildirganini» qayd etdi.

Ushakovning aytishicha, AQSh vakillari Kreml pozitsiyasi haqida Trampga «shaxsan» hisobot beradi, shundan so‘ng, ehtimol, Moskva bilan keyingi muhokamalar uchun telefon orqali bog‘lanishadi. Uitkoff va Kushner bilan uchrashuv arafasida Putin Yevropa Donald Tramp taklif qilgan Ukrainadagi urushni tartibga solish rejasiga Kreml uchun «qabul qilib bo‘lmaydigan» o‘zgartishlar kiritganini aytgan edi.

Urushni to‘xtatish bo‘yicha dastlabki reja 28 banddan iborat bo‘lib, unga ko‘ra Luxansk va Donetsk viloyatlari, jumladan AQSh tomonidan ham, amalda (de-fakto) Rossiya hududi sifatida tan olinishi kerak edi. Xerson va Zaporijjya viloyatlari esa frontning amaldagi chizig‘i bo‘yicha taqsimlanishi ko‘zda tutilgan.

Bundan tashqari, Tramp rejasiga binoan, Ukraina Qurolli kuchlari hozir Ukraina nazorati ostida bo‘lgan Donetsk viloyati qismidagi qo‘shinlarini ham olib chiqishi lozim edi.

AQSh va Ukraina vakillari o‘rtasidagi muzokaralardan so‘ng rejaga Kiyev va Yevropa Ittifoqi mamlakatlari manfaatlarini ko‘proq inobatga oladigan o‘zgartishlar kiritildi. «RBK-Ukraina» manbalari ma’lumot berishicha, xususan, ukrain tomoni Ukraina Qurolli kuchlarining Donetsk viloyatidan chiqib ketishi «imkonsiz» ekanini qat’iy ta’kidlagan.