Toshkentda Braziliyaning yangi elchisi faoliyatini boshladi

O‘zbekiston tashqi ishlar vaziri Baxtiyor Saidov bugun Braziliyaning O‘zbekistondagi yangi tayinlangan elchisi Serjio Rodriges dos Santosni qabul qildi. Bu haqda “Dunyo” axborot agentligi xabar bermoqda.

“Braziliyaning yangi tayinlangan elchisi Serjio Rodriges dos Santos janoblarining ishonch yorliqlarini qabul qildik, – deb yozdi O‘zbekiston TIV rahbari o‘zining Telegram-kanalida. – Ikki tomonlama munosabatlarning jadal rivojlanayotgan dinamikasini muhokama qildik hamda geografik uzoqlikka qaramay, mamlakatlarimiz birgalikda samarali foydalanishi mumkin bo‘lgan ko‘plab imkoniyatlarni ko‘rib chiqdik”, – deya ta’kidladi Baxtiyor Saidov.

Uchrashuv chog‘ida savdo-iqtisodiy sohada o‘zaro tovar ayirboshlash hajmini oshirish, qishloq xo‘jaligi, sanoat kooperatsiyasi, logistika, ta’lim va turizm yo‘nalishlarida qo‘shma loyihalarni amalga oshirish istiqbollari yuzasidan fikr almashildi. Tomonlar siyosiy muloqotni faollashtirish va xalqaro tashkilotlar doirasida hamkorlikni davom ettirishdan manfaatdorligini bildirdi.

Braziliyaning yangi elchisi Serjio Rodriges dos Santos 57 yoshda bo‘lib, 1995 yildan buyon Braziliya Tashqi ishlar vazirligi hamda xorijiy muassasalarda mas’ul lavozimlarda faoliyat yuritib keladi.

U 2022–2025 yillarda Braziliyaning Toshkentdagi elchisi sifatida akkreditatsiya qilingan Rodrigo de Lima Baena Soares o‘rniga tayinlandi. Yangi elchi faoliyati ikki mamlakat o‘rtasidagi diplomatik munosabatlar va amaliy hamkorlikni yangi bosqichga olib chiqishi kutilmoqda.