2026 yilda yangi konlar hisobiga gaz qazib olishdagi pasayishni to‘xtatish rejalashtirilmoqda - Energetika vaziri

2026 yilda O‘zbekiston yangi konlarni ishga tushirish hisobiga qazib olish hajmining keskin kamayish tendensiyasini barqarorlashtirishni rejalashtirmoqda. Bu haqda 11 dekabr kuni Qonunchilik palatasi yig‘ilishida Energetika vaziri Jo‘rabek Mirzamahmudov ma’lum qildi.

Uning ta’kidlashicha, sohadagi vaziyat tabiiy resurslarning «tabiiy kamayib borishi» sababli hanuz «murakkabligicha» qolmoqda.

«Albatta, eng dolzarb mavzularimizdan biri bu uglevodorodlarni qazib chiqarish. Bu bo‘yicha aytib o‘tish kerakki, olib borilayotgan ishlarga qaramasdan, yildan yilga haqiqatda 85 foiz konlarimizning resursi tugaganligini inobatga olib, ulardagi qazib chiqarish tempi, bosimi juda keskin tushib ketyapti», dedi Mirzamahmudov.

Uning so‘zlariga ko‘ra, prezident topshirig‘iga asosan, istiqbolli hududlarga geologiya qidiruvi uchun qo‘shimcha kuchlar va qo‘shimcha mablag‘lar ajratilgan.

«Buning natijasida, Qoraqalpog‘istonning Ustyurt hududida, Mo‘ynoq tumani hududida yangi kon ochildi. Va eng quvonarlisi, ushbu konni hozirgi kunda tizimga ulab, ikkita qudug‘i ulanishi natijasida [sutkasiga] qo‘shimcha 3 million kub metr gaz qazib chiqarish imkoniyati paydo bo‘ldi», dedi vazir.

Ta’kidlanishicha, yil yakunigacha yana yettita quduqni burg‘ulash rejalashtirilmoqda, hozir quvurlarni olib kelib, ulashga tayyorgarlik olib borilmoqda. Ozarboyjonning SOCAR kompaniyasi bilan geologiya-qidiruv ishlari boshlangan, «O‘zbekneftgaz» o‘z loyihalarini davom ettirmoqda.

«Umid qilamizki, keyingi yili yangi konlar hisobidan gaz qazib chiqarish keskin pasayishi tendensiyasini barqarorlashtirishga erishamiz», dedi vazir.