Nogironligi bor ayol koinotga parvoz qildi

Oyoqlari falaj bo‘lgan germaniyalik ayol Blue Origin raketasida besh nafar yo‘lovchi bilan koinotga 10 daqiqalik parvozni amalga oshirdi. 

«Bu eng zo‘r tajriba bo‘ldi!» — dedi Mixaela Bentxaus parvozdan so‘ng. 

U yetti yil avval tog‘ velosipedida halokatga uchrashi oqibatida umurtqasidan jarohatlangandi, lekin bu uning koinotga parvoz qilish haqidagi orzusi amalga oshishiga to‘sqinlik qilmadi. 

«Menga nafaqat manzara va mikrogravitatsiya, balki parvoz jarayonining o‘zi ham yoqdi. Parvozning har bir bosqichi ajoyib bo‘ldi», — dedi u.

Bentxausning so‘zlariga ko‘ra, u velohalokatdan so‘ng imkoniyati cheklangan insonlar uchun «dunyo qanchalar qo‘l yetmas bo‘lib qolishini anglab yetgan». 

Mixaela Bentxaus Yevropa kosmik agentligida aerokosmik va mexatron tizimlar bo‘yicha muhandis bo‘lib ishlaydi.