Qoʻshimcha funksionallar
-
Tungi ko‘rinish
“Gospitalga borish uchun qo‘limda granata portlatdim” – Rossiya armiyasiga yollangan shaxs qamaldi
Andijon viloyatining Bo‘ston tumanida yashovchi 38 yoshli erkak Rossiya armiyasiga yollanib, Ukrainaga qarshi urushda ishtirok etgani uchun ozodlikdan mahrum qilindi. Pul topish uchun Novosibirsk shahriga borib, tegishli hujjatlarsiz ishlab yurgan erkak qo‘lga olingan va urushga yuborilgan. U frontda ataylab o‘z qo‘lida granata portlatgan. So‘ngra gospitaldan qochib, O‘zbekistonga qaytgan.
Foto: Getty images
Rossiya armiyasiga yollangan andijonlik erkak jinoiy jazoga tortildi. Kun.uz sud hujjati bilan tanishdi.
Sud hukmiga ko‘ra, 1987 yilda tug‘ilgan S.X. 2025 yil 14 aprel kuni ishlab pul topish maqsadida Rossiyaning Novosibirsk shahriga borgan. U yerda yo‘llarni ta’mirlashga ixtisoslashgan firmada ishlay boshlagan. Biroq Rossiyada ishlash va vaqtincha yashash bo‘yicha tegishli hujjatlarni rasmiylashtirmagan.
2025 yil 1 iyun kuni S.X. va sherigi politsiya tomonidan ushlanib, hujjati tekshirilgan. Politsiya hujjati borligi uchun sherigini qo‘yib yuborgan, S.X.ni esa olib qolgan.
“Qandaydir hujjatga imzo qo‘ydirishdi. Ertasi kuni poyezdda Rostov viloyatiga olib ketishdi. U yerda 7 kun davomida harbiy tayyorgarlikdan o‘tdik. So‘ng harbiy yuk mashinasida Donetsk shahriga olib borishdi. 2025 yil 25 iyun kuniga qadar jangda qatnashayotgan Rossiya fuqarolari uchun keltirilgan oziq-ovqat mahsulotlarini tashish bilan shug‘ullandim.
Shundan keyin Luhanskda qayta harbiy tayyorgarlikdan o‘tdik. 22 avgust kuniga qadar bizga biriktirilgan hududga Ukraina askarlari o‘tmasligini ta’minlab turdik. Bir amallab gospitalga borish rejasini tuza boshladim. Granataning ustki qismini ajratib olib, qo‘limda ushlab turganimda portladi. Chap qo‘limning kichik barmog‘i uzilib ketdi. So‘ng qo‘limni bilak sohasidan bog‘lab, o‘sha yerdagi harbiy shifokorga ko‘rindim. So‘ng meni avvaliga Luhanskdagi, keyin Volgograd shahridagi gospitalga jo‘natishdi”, degan erkak suddagi ko‘rsatmasida.
S.X. 2025 yil 6 oktyabr kuni gospitaldan qochib chiqib, Moskva shahriga borgan. So‘ngra samolyotga chipta olib, O‘zbekistonga qaytgan.
JIB Bo‘ston tuman sudining 2025 yil 4 dekabrdagi hukmi bilan S.X. Jinoyat kodeksining 154-moddasi (yollanish) 1-qismida nazarda tutilgan jinoyatlarni sodir etganlikda aybli deb topilgan. Unga Jinoyat kodeksining 57-moddasi qo‘llangan holda 3 yil muddatga ozodlikdan mahrum qilish jazosi tayinlangan.
Avvalroq Rossiya armiyasiga yollanib, Ukrainaga qarshi urushda ishtirok etgan surxondaryolik yigit 3 yil muddatga ozodlikdan mahrum qilingandi.
Rossiya-Ukraina urushi
