“Yakunlovchi hal qiluvchi omil - AQSh”: Ryuttening bayonoti

Faqat AQSh prezidenti Donald Tramp Rossiya prezidenti Vladimir Putinni Ukrainadagi urushni to‘xtatishga majbur qila oladi. Bu fikrni NATO bosh kotibi Mark Ryutte Germaniyaning Bild gazetasiga bergan intervyusida bildirgan. Intervyu yakshanba, 28 dekabr kuni nashr saytida e’lon qilingan.

Ryuttening so‘zlariga ko‘ra, Tramp “bu urushni tugatishga butunlay e’tibor qaratgan”. “U Ukrainadagi urushni yakunlashni istaydi. U — Putinni muzokara stoliga o‘tirishga majbur qilgan yagona inson, va oxir-oqibat uni tinchlik kelishuvini tuzishga majbur qila oladigan ham yagona inson”, — dedi NATO bosh kotibi.

Shu bilan birga, u tinchlikka erishish uchun murosalarga borish talab etilishini qayd etdi: “Tinchlik shartnomalarida har doim shunday bo‘ladi”. Biroq qaysi tomon qanday yon berishi kerakligiga Ryutte aniqlik kiritmadi.

Donald Tramp prezidentligi davrida AQSh Ukrainaga ko‘makni to‘xtatib qo‘yishi mumkin, degan xavotirlarni Mark Ryutte, o‘z so‘zlariga ko‘ra, bo‘lishmaydi. U, shuningdek, Tramp davrida ham AQSh NATOga sodiq qolishiga ishonishini bildirdi — demak, Rossiya hujum qilgan taqdirda yevropaliklar Moskvaga yakka holda qarshi turib qolmaydi.

Nega Ukrainadagi urushni to‘xtatish shunchalik qiyinligi haqidagi savolga javob berar ekan, Mark Ryutte shunday dedi: “Putin o‘z vatandoshlaridan 1,1 million nafarini qurbon qilishga tayyor. Shu bilan birga, joriy yilda u faqat juda kichik yutuqlarga erisha oldi”. Uning aytishicha, Rossiya Ukrainaning maydoni jihatidan juda kichik qismlarini bosib olgan — ular mamlakat hududining 1 foizidan kamini tashkil etadi. Ammo NATO hisob-kitoblariga ko‘ra, buning uchun 1,1 milliongacha kishi halok bo‘lgan yoki yaralangan. NATO bosh kotibining ma’lum qilishicha, Rossiya Qurolli kuchlarining oylik yo‘qotishlari 25 ming kishini tashkil etadi.

NATO bosh kotibi G‘arbning Ukrainaga beriladigan xavfsizlik kafolatlari masalasini hal qiluvchi, deb atadi. Uning so‘zlariga ko‘ra, Rossiya prezidentini Ukrainaga qaytadan hujum qilishdan tiyib turishi mumkin bo‘lgan uchta omil bor:

“Birinchi darajada — Ukraina qurolli kuchlari. Ular a’lo darajada tayyor holatda bo‘lishi kerak (…) Ikkinchisi — Fransiya va Buyuk Britaniya yetakchiligidagi, Germaniya va ishtirokchi boshqa davlatlardan iborat ‘ko‘ngillilar koalitsiyasi’. Bu koalitsiya Ukraina QKdan tashqari ravishda ham Putin yana (hujum qilishga) jur’at etmasligi uchun zarur bo‘lgan barcha narsani ta’minlaydi. Uchinchisi — AQSh. Amerika prezidenti avgust oyida Ukraina uchun xavfsizlik kafolatlarida ishtirok etishni istashini aytgan”.

Ryuttening ta’kidlashicha, bu uch omil birgalikda — “Minsk-2” yoki ehtimoliy “Minsk-3”dan “tamoman boshqa narsa”. “Bu yerda gap haqiqatan ham kuchli xavfsizlik kafolatlari haqida ketmoqda”, — dedi NATO bosh kotibi.

Intervyu davomida Ryutte bir qator Yevropa davlatlari Ukrainaga tinchlikparvar qo‘shinlar yuborishga tayyor ekanini esladi. Uning aytishicha, hozir Kiyev ittifoqchilari “ko‘ngillilar koalitsiyasi” uchun aniq konsepsiyani muhokama qilmoqda: qo‘shinlar qayerga va qanday joylashtiriladi, ular yerda, dengizda va havoda qanday harakat qiladi.