Otabek Rustamovich Mavlonov Surxondaryo viloyatining Oltinsoy tumani yangi hokimi etib tayinlandi.
Xalq deputatlari Oltinsoy tumani kengashining viloyat hokimi Ulug‘bek Qosimov ishtirokida o‘tgan navbatdan tashqari sessiyasida tashkiliy masala ko‘rib chiqildi. Shu kungacha Oltinsoy tumani hokimi lavozimida faoliyat yuritib kelgan Bahrom Mahmatrayimov boshqa ishga o‘tishi munosabati bilan lavozimidan ozod etilgani ma’lum qilindi.
Viloyat rahbari tuman hokimi lavozimiga Milliy kadrlar zaxirasidan tavsiya etilgan Otabek Mavlonov nomzodini taklif etdi. Mazkur nomzod Xalq deputatlari tuman kengashi deputatlari tomonidan ma’qullandi.
Ma’lumot uchun, Otabek Mavlonov 1980 yilda Termiz tumanida tug‘ilgan. 2001 yilda Termiz davlat universitetini moliya yo‘nalishi bo‘yicha tamomlagan.
Mehnat faoliyati davomida mahalliy hokimliklar hamda Adliya vazirligi huzuridagi Davlat xizmatlari markazi tizimida turli lavozimlarda faoliyat yuritgan. Jumladan, Termiz tumani hokimining o‘rinbosari, viloyat Investitsiyalar va tashqi savdo boshqarmasi boshlig‘ining o‘rinbosari lavozimlarida ishlagan. Tayinlovga qadar esa Surxondaryo viloyati Investitsiyalar, sanoat va tashqi savdo boshqarmasi boshlig‘i birinchi o‘rinbosari lavozimida faoliyat olib borgan.
O‘z navbatida, Oltinsoy tumani sobiq hokimi Bahrom Mahmatrayimov endi O‘zbekiston Savdo-sanoat palatasi raisi o‘rinbosari lavozimida ishlaydi.
Bahrom Mahmatrayimov 1974 yilda Surxondaryo viloyati Denov tumanida tug‘ilgan. 2000 yilda Termiz davlat universitetini, 2006 yilda Bank-moliya akademiyasini tamomlagan. Iqtisodiyot fanlari bo‘yicha falsafa doktori.
U 1996–2021 yillarda Davlat soliq qo‘mitasi, Moliya vazirligi, Hisob palatasida turli lavozimlarda faoliyat yuritgan. 2021–2023 yillarda Kinematografiya agentligi bosh direktorining o‘rinbosari lavozimida ishlagan.
2023 yil yanvaridan buyon Oltinsoy tumani hokimi vazifasida ishlab kelgan ishlab kelayotgandi
