Loyihaga muvofiq, ishga joylashtirish bo‘yicha xorijiy davlatlar bilan hukumatlararo va idoralararo kelishuvlar sonini 22 tadan 40 taga yetkazish rejalashtirilmoqda. Shuningdek, kasb-hunar va chet tillariga o‘qitish hamda ishga joylashtirish maqsadida xorijiy kompaniyalar bilan tuziladigan kelishuvlar sonini 62 tadan 500 tagacha oshirish maqsad qilingan.
Mehnat migrantlarining umumiy sonida mamlakatdan chiqib ketishda ixtiyoriy ravishda ro‘yxatdan o‘tgan, shuningdek, tashkillashtirilgan tartibda ishga yuborilganlar ulushini 15 foizga yetkazish ham loyihada qayd etilgan vazifalardan.
Bundan tashqari, fuqarolarga xorijda ish o‘rnini topish, huquqiy va moddiy yordam ko‘lamini kengaytirish maqsadida Migratsiya agentligining vakolatxona (vakil)lari tashkil etiladigan davlatlar sonini 4 tadan 9 taga yetkazish nazarda tutilmoqda.
