Venesuela muxolifatchilar qamoqdan ozod etilishini e’lon qildi

Venesuela hukumati payshanba kuni, 8 yanvar kuni venesuelalik va xorijlik mahbuslarning “katta soni” ozod etilishini e’lon qildi. Ozod qilinganlar orasida mashhur muxolifat namoyondalari ham bor. Ozod etilayotgan mahbuslarning aniq soni va ismlari hozircha ma’lum emas, deb xabar qiladi dpa agentligi. Ispaniya Tashqi ishlar vazirligi esa ozod qilinganlar orasida besh nafar Ispaniya fuqarosi ham borligini bildirdi.

El Nacional gazetasi ma’lumotlariga ko‘ra, venesuelalik muxolif siyosatchi Xuan Pablo Guanipa hamda huquq himoyachisi Rosio San-Migel ozodlikka chiqarilishi kerak. OAV shuningdek Rafael Tudares — siyosatchi Edmundo Gonsales Urrutiining kuyovi ham ozod qilinishi mumkinligi haqida xabar qilmoqda. Muxolifat va xalqaro kuzatuvchilar fikricha, Gonsales Urrutiya Venesueladagi so‘nggi prezidentlik saylovlarida amalda Nikolas Maduroni mag‘lub etgan.

Foro Penal huquq himoya tashkiloti ma’lumotiga ko‘ra, Venesuelada hibsda taxminan 800 nafar siyosiy mahbus bor. Ularning ko‘pchiligi 2024 yili Nikolas Maduro qayta saylanganiga qarshi namoyishlar paytida hibsga olingan. Xalqaro tashkilotlar va faollar Venesuela kuch tuzilmalarini inson huquqlarini jiddiy buzishda ayblamoqda.

Venesuelalik huquq himoyachisi Marta Tineoning aytishicha, mahbuslar “Gelikoid” (El Helicoide) qamoqxonasidan ozod etilmoqda. Ushbu qamoqxona saqlash sharoitlarining o‘ta shafqatsizligi va Maduro rejimiga qarshi bo‘lganlarga nisbatan qiynoqlar qo‘llanishi bilan tanilgan.

Nobel tinchlik mukofoti laureati va Venesuela muxolifati yetakchisi Mariya Korina Machado siyosiy mahbuslarning ozod etilishini olqishladi. U bundan avval Delsi Rodriges rahbarligida tuzilgan Venesuelaning yangi hukumatini “mutlaqo vaqtinchalik” deb ta’riflagan, AQSh prezidenti Donald Trampni Karakasda Nikolas Maduroni qo‘lga olish operatsiyasi uchun maqtagan va Vashington harakatlarini “insoniyat, erkinlik va inson qadr-qimmati uchun ulkan qadam” deb atagan.