Batik Air Toshkent–Langkavi yo‘nalishida qo‘shimcha to‘g‘ridan to‘g‘ri reyslar ochadi

Bernama'da qayd etilishicha, Malayziyaning Toshkentdagi elchixonasi ma’lumotlariga ko‘ra, turizm va ta’lim ikki mamlakat o‘rtasidagi munosabatlarni mustahkamlashning asosiy ustuvor yo‘nalishlari sifatida belgilangan.

Malayziyaning O‘zbekistondagi elchisi Ilhom Tuax Ilyosning ta’kidlashicha, bu yo‘nalishlardagi hamkorlikni faollashtirish Malayziyaning Visit Malaysia 2026 davlat dasturi maqsadlariga ham mos keladi. Shuningdek, Malayziyaning Batik Air aviakompaniyasi Toshkent va Langkavi oroli o‘rtasida qo‘shimcha to‘g‘ridan to‘g‘ri aviaqatnovlarni yo‘lga qo‘yishi rejalashtirilgan.

Qo‘shimcha reyslar yo‘lga qo‘yilishi mamlakatlar o‘rtasida sayyohlar almashinuvini ko‘paytirish, xalqaro aloqalarni mustahkamlash, savdo, investitsiya hamda madaniy almashinuv uchun yangi imkoniyatlar yaratishi kutilmoqda.

Ma’lumotlarga ko‘ra, hozirda Uzbekistan Airways, Batik Air Malaysia va Air Asia aviakompaniyalari tomonidan ikki mamlakat o‘rtasida haftasiga 8 ta to‘g‘ridan to‘g‘ri aviaqatnov amalga oshirilmoqda.

Ta’lim yo‘nalishida elchi o‘zbek yoshlari uchun Malayziyada o‘qish imkoniyatlarini targ‘ib qilish bo‘yicha ishlar davom ettirilishini, ayniqsa, Malayziyaning shimoliy shtatlarida joylashgan universitetlar jalb etilishini aytgan. Maqolada keltirilishicha, 2025 yilda Malayziyaning davlat va xususiy oliy ta’lim muassasalarida 600 nafardan ortiq o‘zbekistonlik talaba tahsil olgan va Malayziya tomoni joriy yilda ular sonini ko‘paytirishni maqsad qilgan.

Shuningdek, Batik Air'ning to‘g‘ridan to‘g‘ri reyslari nafaqat O‘zbekiston, balki Qozog‘iston, Qirg‘iziston, Tojikiston, Turkmaniston va Rossiyadan kelgan yo‘lovchilarga ham Toshkent orqali Langkaviga sayohat qilish imkonini berishi qayd etilgan. Bundan tashqari, qishki turizmga qiziquvchi malayziyaliklar uchun Toshkentdan bir soatlik masofada joylashgan Chimyon tog‘lari manziliga safar qilish imkoniyati alohida tilga olingan.

Maqolada so‘nggi yillarda sayyohlar oqimi o‘sib borayotgani ta’kidlanib, 2025 yilda O‘zbekistonga 11 mingdan ortiq malayziyalik sayyoh tashrif buyurgani, bu yil esa ko‘rsatkich yana ortishi kutilayotgani bildirilgan.