Mo‘ynoqda yangi quduqdan sanoat miqyosida gaz oqimi aniqlandi

Ustyurt mintaqasidagi “Mo‘ynoq” koni yaqinida joylashgan Shagirlik-quyi yura 2-sonli izlov qudug‘ida sanoat miqyosida tabiiy gaz oqimi qayd etildi.

Foto: Videodan kadr

Ushbu maydon Tog‘-kon sanoati va geologiya vazirligi tasarrufidagi “O‘zbekgeofizika” AJ hamda “Neft va gaz konlari geologiyasi hamda qidiruvi instituti” DM tomonidan 3D seysmik qidiruv ishlari ma’lumotlari asosida chuqur izlov burg‘ilashga tayyorlangan.

Ma’lum qilinishicha, quduq Jamiyat va uning tarkibida faoliyat olib borayotgan Loyiha boshqaruv ofisi mutaxassislari tomonidan burg‘ilangan. Qayd etilishicha, ushbu ofis davlatimiz rahbarining topshirig‘iga ko‘ra, xorijdagi zamonaviy kompaniyalarda neft-gaz yo‘nalishida ishlab, mamlakatga jalb etilgan malakali mutaxassislar guruhidan tashkil topgan.

2026 yil 10 yanvar kuni quduq tubi quyi yura qatlamlarida 5265 metr chuqurlikkacha burg‘ilanib, 5265–5061 metr oralig‘ida tabiiy gaz uyumlari aniqlangan.

Quyi yura qatlamlarining geologik tuzilishini o‘rganish hamda aniqlangan gaz uyumlarining tarqalish chegarasini belgilash maqsadida mazkur maydonda navbatdagi 3 va 4-sonli izlov-qidiruv quduqlarini burg‘ilash rejalashtirilmoqda.

Tayyorlagan: Отабек Матназаров

#gaz #Mo‘ynoq