Buvaydada buyruqni bajargani uchun ishdan olingan maktab direktori lavozimiga tiklandi

Farg‘ona viloyati, Buvayda tumanidagi 37-son umumta’lim maktabi direktori Hasanboy Nishonov lavozimiga tiklandi. Bu haqda Davlat mehnat inspeksiyasi xabar berdi. Avvalroq, u dam olish kunlari o‘qituvchilarni navbatchilikka jalb qilgani uchun ishdan olingan edi.

«O‘rganish jarayonida Farg‘ona viloyati maktabgacha va maktab ta’limi boshqarmasi tomonidan mehnat qonunchiligi talablari buzilgan holda maktab direktori lavozimidan ozod etilgani aniqlandi. Inspeksiya tomonidan berilgan yozma ko‘rsatmaga asosan, boshqarmaning 2026 yil 6 yanvardagi 1-k-sonli buyrug‘i bekor qilindi», deyiladi xabarda.

37-son maktab direktori Hasanboy Nishonov 2025 yil 25 dekabrdan 2026 yil 6 yanvargacha o‘qituvchilarni tunu-kun navbatchilikka jalb qilganidan keyin Farg‘ona viloyati Maktabgacha va maktab ta’limi boshqarmasi tomonidan ishdan olingan edi.

Keyinchalik ushbu tashabbus Maktabgacha va maktab ta’limi vazirligidan chiqqani, barcha hududlar boshqarmalari, tuman va shaharlar bo‘limlariga shu haqda topshiriq berilgani ma’lum bo‘ldi.

Davlat mehnat inspeksiyasi holatni o‘rganib, Farg‘ona viloyati Maktabgacha va maktab ta’limi boshqarmasi tomonidan mehnat qonunchiligi talablari buzilgan holda maktab direktori lavozimidan ozod etilgani aniqlandi.