Roskomnadzor Telegram’ni qisman bloklamoqda

Aloqa, axborot texnologiyalari va ommaviy kommunikatsiyalar sohasida nazorat qiluvchi federal xizmat — Roskomnadzor (RKN) Telegram’ni qisman bloklamoqda. Bu haqda “Moskva 24” telekanali juma kuni, 16 yanvarda manbaga tayanib xabar qildi. Foydalanuvchilar messenjerda videolar sekin yuklanayotgani va ilova ishida uzilishlar bo‘layotganidan shikoyat qilmoqda.

“Ha, bu RKN tomonidan joriy etilgan yangi cheklovlar”, — deya ta’kidlagan manba.

Shu bilan birga, Davlat dumasining axborot siyosati, axborot texnologiyalari va aloqa masalalari qo‘mitasi raisi o‘rinbosari Andrey Svinsov Telegram RF hokimiyati bilan “hamkorlik qilayotgani”ni aytib, uni to‘liq bloklash kutilmayotganini bildirdi.

“Shunga qaramay, talablarning butun majmuasini bajarish kerak. Masalan, hali ham turli bemaza gaplarni yozadigan, faktlarni buzib ko‘rsatadigan anonim Telegram-kanallar bor. Rossiya hududida bu kanallar unchalik tezkorlik bilan bloklanmayapti”, — dedi Svinsov “Radiotochka NSN”ga. “Telegram faolroq reaksiya qilishi kerak”, — deb qo‘shimcha qildi u.

2025 yil avgust oyida Roskomnadzor messenjer orqali qo‘ng‘iroqlarni cheklagan edi. Hokimiyat bu cheklovlarni messenjer go‘yoki “tovlamachilik, RF fuqarolarini diversion va terroristik faoliyatga jalb qilish” uchun maydon taqdim etayotgani bilan izohlagan.

Keyinroq, 2025 yil 28 noyabr kuni RKN boshqa bir messenjer — WhatsApp agar Rossiya qonunlari talablarini bajarmasa va huquqni muhofaza qiluvchi organlar bilan hamkorlikni yo‘lga qo‘ymasa, to‘liq bloklanishi haqida ogohlantirgan. 22 dekabrdan boshlab RFdagi foydalanuvchilar ilovadagi muammolar kuchayganidan shikoyat qila boshlagan. WhatsApp ishi 70–80 foizgacha sekinlashtirilgan bo‘lishi mumkin. Svinsov, shuningdek, messenjer 2026 yilda to‘liq bloklanishini aytdi.