Kaliforniya gubernatori Yevropa siyosatchilarini Trampga nisbatan dadil pozitsiya egallashga chaqirdi

Kaliforniya shtati gubernatori Gevin Nyusom Davosda o‘tayotgan Jahon iqtisodiy forumida jurnalistlar bilan muloqot qilib, Yevropa siyosatchilarini Trampga nisbatan dadil pozitsiya egallashga chaqirdi.

“[Yevropa uchun] qaddini tik tutish vaqti keldi. Jiddiylashadigan, lapashang sherik bo‘lishni bas qiladigan payt keldi. Gavdani rostlab, mustahkam turish, “umurtqali bo‘lish” vaqti keldi. AQShda ko‘rib turibman: Kongress bo‘shanglik qilyapti, ikkala tomonga ham “o‘ynayapti”. Hozir – prinsipni ushlaydigan, kuchli bo‘ladigan, birlashadigan payt”, – dedi Demokratik partiya vakili.

Nyusom Yevropa yetakchilari va umuman dunyo siyosatchilarining Trampga munosabatini yana bir bor “lapashanglik” deb atarkan, ular Trampga “yaltoqlanish”ni bas qilishi kerakligini aytdi.

“Bunaqangi lapashang bo‘lishlarini tushuna olmayman. Unga bir og‘iz ham qarshi gapirishmayapti. Bu yerga jahonning hamma yetakchilari uchun tizzani asraydigan prokladkalardan bir quti olib kelishim kerak ekan... Unga tojlar kiydirishyapti... Nobel mukofotlarini berib yuborishyapti... Bu – yaltoqilik. Bu – shunchaki sharmandalik.

Umid qilamanki, ular jahon sahnasida qanchalik sharmandali ko‘rinayotganliklarini o‘zlari tushunishadi. Eng kamida Amerika tomondan turib qaraganda, bu – sharmisorlik. Yevropaliklar o‘zi uchun o‘zi qaror qabul qilishi kerak”.

Kaliforniya gubernatori jurnalistning: “Yevropa diplomatiya qilyapti” degan ta’kidiga qo‘shilmasligini bildirdi.

“Donald Tramp bilan diplomatiya? U – tirannozavr. Yo siz u bilan jangga chiqasiz, yoki u sizni yamlamay yutadi. Yo unisi, yo bunisi. Yevropaliklar boshini baland ko‘tarishi, qat’iyatli va jips bo‘lishlari kerak”.

Trampning siyosati Yevropa Ittifoqining parchalanishiga sabab bo‘lishi mumkinmi, degan savolga javoban Nyusom AQSh prezidentini kuchli zarb bilan tepilgan buzg‘unchi to‘pga o‘xshatdi.

“Bu masalada mubolag‘a qilishni istamayman, lekin bu odam – hammayoqni vayron qiladigan koptok. Umid qilamanki, odamlar uyqudan uyg‘onib, biz nimaga ro‘baro‘ kelib turganimizni tushunadi. Bu – favqulodda holatning ayni o‘zginasi”.

Kaliforniya gubernatorining bu gaplaridan keyin, Oq uy uning Davos forumida spiker sifatidagi ishtirokini bloklab qo‘ydi. Trampning matbuot xizmatiga ko‘ra, Gevin Nyusomdek “uchinchi darajali gubernator”ni Davosda “hech kim tanimaydi”, u Shveytsariyaga kelib “yallo qilib yurishdan ko‘ra, Kaliforniyada o‘zi yaratgan muammolarni hal qilish bilan shug‘ullanishi” kerak.

• Ma’lumot uchun, agar Kaliforniya shtati alohida davlat bo‘lganida, yalpi ichki mahsulotining hajmi bo‘yicha dunyodagi to‘rtinchi eng katta iqtisodiyot bo‘lgan bo‘lardi.