​​​​​​​Uyda o‘tirib daromad topayotgan qishloq kelini: onlayn faoliyat orqali mustaqillikka erishgan 22 yoshli Marjona haqida

Ilk daromadim atigi 50 ming so‘m bo‘lgan. Lekin uning qiymati miqdorida emas, ma’nosida edi. Uni turmush o‘rtog‘imga ko‘rsatib: “Mana, onlayn tarmoq orqali o‘z daromadimni topdim. Men uddalay oldim deganman. Orada esa buyurtmalarimni turmush o‘rtog‘imga ham oshirganman (sohani biroz bilar edilar) Boshlanishida o‘zim ham eplay olishimga ishonmagan edim. Ammo harakat va qat’iyat natija berdi. Bugun ortga qarab, eng katta yutug‘im — bu pul emas, balki “men qila olaman” degan ishonch ekanini anglayman”.

Eng katta to‘siq — o‘zingizga ishonmaslik

«Hayotimda shunday davr bo‘lganki, “Men buni eplay olmayman”, deb o‘ylaganman. Atrofimda ko‘plab insonlar bir ishni uddalayotgandek ko‘rinar, ammo men o‘zimga nisbatan ishonchsiz edim. Hatto, ularning orqasida albatta tanishi, yordamchisi yoki moddiy tayanchi bor, deb hisoblaganman. Shuning uchun ham “bu mening qo‘limdan kelmaydi” degan fikr meni uzoq vaqt ortga tortgan.

Vaqt o‘tib tushundimki, bu yo‘ldan boshqa insonlar ham oddiy harakat, ishonch va tinimsiz mehnat orqali o‘tayotgan ekan. Asosiysi — o‘z ustida ishlash va taslim bo‘lmaslik.

Men turli kurslarda o‘qishni boshladim, ayollar davrasiga qo‘shildim. O‘rganish, muloqot va tajriba almashish orqali o‘zimga bo‘lgan ishonchim asta-sekin qayta tiklana boshladi. Eng muhimi, o‘z fikrimni ochiq aytishni, odamlar orasida o‘z nuqtai nazarimni himoya qilishni o‘rgandim».

Vaqtni boshqarish: oila va ish o‘rtasidagi muvozanat

«Bugungi kunda vaqtni to‘g‘ri boshqarish har bir inson, ayniqsa ayollar uchun muhim masalaga aylangan. Oila, farzand tarbiyasi, ish va shaxsiy rivojlanish — bularning barchasi bir vaqtda e’tibor talab qiladi. Shu sababli, kundalik hayotda eng muhim vazifalarni ajrata bilish va ustuvorlikni to‘g‘ri belgilash muhim ahamiyatga ega. Shaxsiy tajribamdan kelib chiqib aytishim mumkinki, men uchun birinchi o‘rinda har doim oila turadi. Agar ish buyurtmalari yoki onlayn faoliyat bilan bog‘liq vazifalar bo‘lsa-yu, shu paytda turmush o‘rtog‘imga yoki farzandimga e’tibor kerak bo‘lsa, ishni keyinroqqa qoldirib, avvalo oilaviy masalalarni hal qilaman. Chunki vaqt o‘tadi, lekin farzandning bugungi e’tibori va mehrga bo‘lgan ehtiyoji ortga qaytmaydi. Vazifalarni bajarishda “qaysi biri hozir muhim?” degan savolga javob topishga harakat qilaman. Ba’zi ishlar shoshilinch bo‘ladi, ayrimlarini esa biroz keyinga surish mumkin. Shu tahlil orqali kun davomida qilinadigan ishlarimni tartibga solaman. Masalan, qaynonam farzandimga qarab turadilar, turmush o‘rtog‘im esa jonli efir paytida bolam bilan shug‘ullanadilar. Ba’zida ovqatlanishga ulgurmasam, kasal bo‘lsam yoki ish jarayonida bo‘lsam, ovqatimni ham olib kirib berishgan paytlar bo‘lgan. Xulosa qilib aytganda, vaqtni boshqarish — bu hammasiga birday ulgurish emas, balki hayotdagi eng muhim narsalarga to‘g‘ri vaqtda e’tibor bera olishdir. Oila va ish o‘rtasidagi muvozanatni saqlash esa nafaqat samaradorlikni oshiradi, balki ichki xotirjamlikni ham ta’minlaydi».

Uyda o‘tirib daromad topishni xohlovchilar uchun tavsiyalar

«Uyda daromad topishni o‘ylayotganlar, avvalo, birdan boyib ketaman yoki qisqa vaqt ichida katta narsalarni olaman degan xomxayollarga berilmasliklari kerak. Bunday xayollar ko‘pincha insonni noto‘g‘ri yo‘nalishga olib keladi yoki harakatni to‘xtatishga sabab bo‘ladi. Men tavsiya qilamanki, har bir inson avvalo o‘ziga aniq ish reja tuzsin. Qayerdan boshlaydi, nimalarga harakat qiladi, qanday ko‘nikmalarni o‘rganadi — bularning barchasi belgilangan bo‘lsa, ish davomiy bo‘ladi. Reja bilan birga intizom va unga amal qilish ham muhim. Boshlanish bosqichida qo‘rquvga berilmaslik, birinchi urinish muvaffaqiyatsiz bo‘lsa ham tushkunlikka tushmaslikni tavsiya qilaman. Masalan, birinchi urinishda ish sizga mos kelmayotganday tuyulishi yoki natija kutganingizdek bo‘lmasligi mumkin. Bunday holatda darhol voz kechmaslik va harakatni davom ettirish muhim. Shuningdek, o‘rganishni bepul manbalardan boshlashni tavsiya qilaman. Masalan, Telegramdagi “kanal xazinasi” bo‘limi yoki bepul darsliklar va matnli qo‘llanmalar orqali boshlang‘ich bilimlarni olish mumkin. YouTube'da ham daromad topish bo‘yicha yuzlab bepul videodarslar mavjud. Men shuni tavsiya qilamanki, avvalo bepul o‘rganib, o‘zingiz sinab ko‘ring. Shu bilan birga kichik daromadga chiqib, soha sizga mos kelishini tushunganingizdan so‘nggina, ustoz yoki pulli kurslarda chuqurroq o‘rganishni davom ettiring. Xulosa qilib aytganda, uyda daromad topish imkoniyati mavjud, biroq buning uchun reja, intizom, sabr va uzluksiz harakat zarur. Har bir inson o‘z harakati bilan natijaga erisha oladi».