Prezident bojxona xodimlarini kasb bayrami bilan tabrikladi

26 yanvar kuni O‘zbekiston davlat bojxona xizmati organlari xodimlari kuni munosabati bilan mamlakat bojxona tizimi vakillari — serjant, ofitser va generallar, shuningdek, faxriylar bayram bilan qutlandi.

Tabrikda mustaqillik yillarida bojxona organlari mamlakat iqtisodiy xavfsizligini ta’minlash, milliy manfaatlarni himoya qilish va davlat chegaralari daxlsizligini asrashda ishonchli tayanch bo‘lib kelayotgani ta’kidlandi. Yangi O‘zbekiston sharoitida tizimni modernizatsiya qilish, ochiq va samarali boshqaruv tamoyillarini joriy etish borasida amalga oshirilayotgan ishlar qayd etildi.

Tabrikda sohani raqamlashtirish, byurokratiya va inson omilini kamaytirish, xalqaro standartlarni keng joriy etish natijalari keltirildi. Jumladan, keyingi yillarda bojxona rasmiylashtiruvi vaqti 40 foizga qisqartirilgani, deklaratsiyalarning 20 foizi inson omilisiz amalga oshirilayotgani ma’lum qilindi. 2025 yilda 76,2 trillion so‘m bojxona to‘lovlari undirilib, ko‘rsatkich 21 foizga oshgani va davlat budjeti daromadlaridagi ulushi 25 foizga yetgani aytildi.

Shuningdek, 1,2 trillion so‘mlik tovarlarning noqonuniy aylanmasiga chek qo‘yilgani, xavflarni oldindan tahlil qilish orqali 7 trillion so‘m, tovarlarni rasmiy importga jalb etish hisobiga qo‘shimcha 2,3 trillion so‘m budjet mablag‘lari undirilishi ta’minlangani qayd etildi.

Tabrikda huquqbuzarliklarga qarshi kurash yo‘nalishidagi natijalar ham keltirildi: 1,8 tonna giyohvandlik, 1,1 tonna psixotrop va kuchli ta’sir etuvchi moddalarning noqonuniy muomalasiga chek qo‘yilgani bildirildi. Jahon savdo tashkiloti talablari asosida bojxona tartib-taomillari soddalashtirilgani, Jahon bojxona tashkiloti bilan hamkorlik yo‘lga qo‘yilgani va xalqaro nufuz ortib borayotgani ta’kidlandi.

Bojxona laboratoriyasi va kinologiya markazining mintaqaviy filial maqomiga ega bo‘lishi, Bojxona institutining PICARD dasturi standartlari asosida akkreditatsiyadan o‘tishi, bojxona idorasining tashkilot Audit qo‘mitasi a’zoligiga saylanishi ham sohadagi o‘zgarishlar sirasiga kiritildi. Tizimda bilimli va tashabbuskor yosh kadrlar safining kengayib borishi alohida qayd etildi.

Shu bilan birga, kelgusi besh yilda “yashirin iqtisodiyot” ulushini ikki karra qisqartirishda bojxona organlari faoliyatini kuchaytirish dolzarb vazifa ekani bildirildi. O‘zbekistonning Jahon savdo tashkilotiga a’zo bo‘lib kirishi munosabati bilan bojxona tizimining samaradorligi va mas’uliyatini tubdan oshirish zarurligi qayd etildi.

Tabrikda soha rivoji, moddiy-texnik baza va kadrlar salohiyatini mustahkamlash, xodimlar mehnatini munosib rag‘batlantirish doimiy e’tibor markazida bo‘lishi ta’kidlandi.