Qoʻshimcha funksionallar
-
Tungi ko‘rinish
Toshkent shahar soliq boshqarmasi boshlig‘i va Shayxontohur tumani soliq inspeksiyasi boshlig‘i ishdan olindi
Toshkent shahri soliq boshqarmasi hamda Shayxontohur tumani soliq inspeksiyasi boshliqlari ishdan olindi. Ularning faoliyatini o‘rganib, qonun ustuvorligini ta’minlash topshirilgan.
Shavkat Mirziyoyev 27 yanvarda bo‘lib o‘tgan yig‘ilishda Toshkent shahri soliq idoralarini tanqid qildi va qator rahbarlarini ishdan oldi.
Xususan, Shayxontohur tumani soliq inspeksiyasi boshlig‘i Hojiakbar Mullajonov va Toshkent shahar soliq boshqarmasi boshlig‘i Yunusjon Nasimjonovni ishdan olish, faoliyatini o‘rganib, qonun ustuvorligini ta’minlash topshirildi.
Soliq qo‘mitasining yangi raisi Farrux Po‘latovga Toshkent shahridagi barcha tuman soliq inspeksiyalarining boshliqlarini ishdan olib, vazifasini bajaruvchi qilib qo‘yish topshirildi.
Qo‘mita raisi va qo‘mitaga tayinlangan komplayens bo‘yicha yangi o‘rinbosar A.Soliyevga korrupsiyaga murosasiz muhitni yaratish, Toshkent shahri soliq rahbarlarining lavozimga loyiqligini ko‘rib chiqib, ularning o‘rnini vatanparvar, yangilikka intilib ishlaydigan shijoatli yoshlar bilan to‘ldirish vazifasi qo‘yildi.
Bosh prokuratura huzuridagi departamentning shahar boshqarmasi boshlig‘i o‘rinbosari A.G‘aniyev qo‘shtirnoq ostidagi «tadbirkor»larga soliqdan qochishda yo‘l ko‘rsatib yurgani uchun uni bugunning o‘zida ishdan olish topshirildi.
A.Soliyev va Toshkent shahar hokimiga komplayens bo‘yicha o‘rinbosar etib tayinlangan M.Mirhamidov poytaxtda yashirin iqtisodiyotga qarshi murosasiz muhit yaratishga mas’ul bo‘lishi belgilandi.
Hojiakbar Mullajonov 1988 yilda Toshkent shahrida tug‘ilgan. 2010 yili Toshkent davlat iqtisodiyot universitetini tamomlagan. U mehnat faoliyatini 2014 yildan Toshkent shahri G‘aznachilik boshqarmasi Shayxontohur tumani bo‘limida inspektorlikdan boshlab, yangi lavozimga tayinlanguniga qadar Yakkasaroy tumani G‘aznachilik bo‘linmasi boshlig‘i sifatida faoliyat yuritib kelgan. 2019 yil iyunida Shayxontohur tumani davlat soliq inspeksiyasi boshlig‘i etib tayinlangandi.
Yunusjon Nasimjonov 1967 yilda Toshkent shahrida tug‘ilgan. Soliq organlaridagi faoliyati davomida Farg‘ona va Jizzax viloyati davlat soliq boshqarmasi boshlig‘i, Toshkent shahar Yashnobod tumani davlat soliq inspeksiyasi boshlig‘i lavozimlarida ishlagan, bir muddat Soliq qo‘mitasi raisiga o‘rinbosar bo‘lgan. 2021 yil noyabrida O‘zbekiston prezidenti farmoyishi bilan Toshkent shahar davlat soliq boshqarmasi boshlig‘i lavozimiga tayinlangandi.
