Rossiyada fizik olim urushga qarshi postlari uchun 7 yilga hukm qilindi

Leningrad viloyatining Gatchina shahar sudi Sankt-Peterburg yadroviy fizika institutining sobiq xodimi Dmitriy Bogmutni umumiy rejimdagi koloniyaga yetti yil muddatga ozodlikdan mahrum qildi. Bu haqda Leningrad viloyati prokuraturasi matbuot xizmati juma kuni, 30 yanvarda xabar berdi.

Olimga nisbatan jinoiy ta’qibga uning ijtimoiy tarmoqlardagi urushga qarshi izohlari va Rossiyaning Ukrainaga bosqini haqidagi materiallarni, jumladan Deutsche Welle (DW)ning “Pavlogradga hujum, Putin qanday qilib mudofaa urushiga tayyorlanayotgani va RF armiyasining jang qobiliyatini susaytirishi” nomli videosini repost qilgani sabab bo‘lgan. Shuning uchun u “Rossiya armiyasi haqida feyklar tarqatish”da ayblangan.

“Men 1975 yilda tug‘ilganman, mening eng yaxshi yillarim Gorbachyovning qayta qurishi va 90-yillarga to‘g‘ri kelgan. ‘Tinchlik — dunyoga!’ degan shiorlar bilan bo‘lgan namoyishlar esga tushadi. Shu yillar davomida ilgari surilgan tinchlikparvar kun tartibi — aynan shuni sudga yetkazishga urinyapman. Hozir urushni ‘maqtash’ni men na qabul qila olaman, na tushuna olaman. Har qanday urush faqat qon, azob-uqubat va o‘lim olib keladi”, — dedi Bogmut sudda so‘nggi so‘z bilan chiqar ekan. Uning so‘zlarini “OVD-Info” nashri keltiradi.

51 yoshli Dmitriy Bogmut kondensatsiyalangan holat (qattiq jism fizikasi)ni tadqiq etish bo‘limida texnik bo‘lib ishlagan. 2024 yil aprel oyida uni ushlab, tergov hibsxonasiga joylashtirishgan va o‘shandan beri u qamoqda. Ayblovga ko‘ra, olim urushga qarshi materiallarni, jumladan DW videosini ham 2023 yilda — ya’ni RF hokimiyati DWni “nomaqbul tashkilot” deb e’lon qilishidan ancha oldin e’lon qilgan.

2025 yil dekabr oyida Rossiya hokimiyati Germaniyaning jamoat-huquqiy mediakompaniyasi Deutsche Welle'ni “nomaqbul tashkilotlar” reyestriga kiritdi.

DW bosh direktori Barbara Massing bu qarorni izohlar ekan, shunday degan: “Rossiya rejimi erkin ommaviy axborot vositalarini sukut saqlashga majbur qilishga urinayotgan bu navbatdagi harakat uning so‘z erkinligini qanchalar hurmat qilmasligini va mustaqil axborotdan qanchalar qo‘rqishini ko‘rsatadi”. Germaniya hukumati ham Rossiyaning Deutsche Welle'ga qarshi harakatlarini qat’iy qoralagan.

Rossiyada DWga “noma’lum tashkilot” maqomining berilishi mediakompaniyaga nisbatan cheklovlarning yanada kuchaytirilganini anglatadi. Rossiyada “nomaqbul tashkilot” bilan hamkorlik jinoiy javobgarlikka sabab bo‘ladi va katta jarimalar, hatto ozodlikdan mahrum qilish bilan tahdid qiladi. Rossiya hokimiyati bunday “hamkorlik” sifatida “nomaqbul” maqomiga ega OAVda chiqqan jurnalistik materiallarni ijtimoiy tarmoqlarda tarqatishni ham baholashi mumkin. Ammo qonunga ko‘ra, istalgan OAVni o‘qish yoki unga obuna bo‘lishning o‘zi uchun javobgarlik nazarda tutilmagan.