Energetik sulh nima bo‘ldi?

Rossiya Trampning iltimosiga asosan, Ukraina energetika tizimini nishonga olishni bir necha kunga susaytirgan bo‘lsa-da, buni aslo gumanizm deb bo‘lmaydi: aholi turar joylari, noharbiy yo‘lovchi avtobuslari va logistika obektlariga zarbalar davom etmoqda. Tahlilchilarga ko‘ra, bu holat – urushning asl mantig‘ini ochib beradi. Muzokaralardan naf bo‘lmayotgani esa shu mantiqdan kelib chiqadi.

Kun.uz'ning “Geosiyosat” dasturida siyosiy tahlilchilar AQSh prezidenti Donald Trampning rossiyalik hamkasbi Vladimir Putinga iltimosi bilan e’lon qilingan bir necha kunlik “energetik sulh” haqida so‘z yuritdi.

Xayrulla Umarov: Energetika – har qanday davlat uchun iqtisodiyotning asosiy tayanchi hisoblanadi. Shu sabab urushayotgan tomonlar aynan energetika va xomashyo ta’minoti bilan bog‘liq nuqtalarga zarba berishga intiladi. Bunda ikkita maqsadni ajratib ko‘rsatish mumkin. Birinchisi, sovuq ob-havo sharoitida aholida urushga nisbatan norozilikni kuchaytirish va ijtimoiy vaziyatni izdan chiqarish maqsadi. Ikkinchisi esa, harbiy sanoat kompleksiga zarar yetkazish, chunki bu kompleks katta miqdorda energiya talab qiladi. Shu sababli davlatlar o‘z nazarida muhim harbiy korxonalarni energetika bilan ta’minlaydigan nuqtalarga zarba berishni davom ettiraveradi.

Ukraina bugungi kunda kesishgan manfaatlar hududidan bufer hududga aylangan. Bufer hududlarda konfliktlar to‘xtamaydi. Kelishuv bo‘yicha rozilik berilishi mumkin, ammo yaqin orada bu urush to‘xtamaydi. Sababi Rossiya o‘zining asosiy maqsadlariga erishishga intiladi. Ukraina esa o‘z hududlarini bermasligini bildirgani sabab, urushning asosiy vazifasi va kuchlar nisbati o‘zgarmaguncha vaziyat davom etadi. Hozircha bu holatning yaqin orada o‘zgarishi kuzatilmayapti.

Shuhrat Rasul: Tramp doimo erishgan yutuqlari va g‘alabalarini sanashni va markazda bo‘lishni yaxshi ko‘radi. U nafaqat yaxshi muomala qiladi, balki doimo komplimentlar aytib, xushomad ham qiladi. Amalda esa u faqat o‘z manfaatlari, o‘z nuqtayi nazaridan harakat qiladi. Shu nuqtayi nazardan qaraganda, sulhga lozim darajada amal qilinmayotgani – Trampni diskreditatsiya qilish maqsadida amalga oshirilgan deb hisoblash mumkin.

1 fevralda Abu-Dabida uchrashuv bo‘lishi kutilgan edi, biroq u 3 fevralga qoldirilmoqda. Umuman olganda, Rossiya tomoni har doim manyovr bilan, sulhni cho‘zish bilan shug‘ullanmoqda. Abu-Dabidagi navbatdagi uchrashuvlar o‘tkazilmasligi ham mumkin, chunki eng muhim ikki nuqtada kelishuv yo‘q. Bu nuqtalar – Ukrainaning Rossiya tomonidan bosib olingan hududlari, Zaporojye AES masalasi. Qolaversa, Ukraina AQShdan xavfsizlik kafolatlari ham talab qilyapti. Ukrainlarga ko‘ra, AQSh bu kafolatlarni o‘t ochishni to‘xtatishdan oldin berishi kerak. Mana shu uchta masalada kelishuv bo‘lmagani sabab, qolgan gaplar bugungi kunda umuman safsata bo‘lib qoladi.

Suhbatni to‘liq YouTube platformasida tomosha qilishingiz mumkin.