Chitada IESdagi avariya sabab qisman blekaut yuz berdi

Mahalliy OAV xabar berishicha, payshanbaga o‘tar kechasi — 5 fevralda Chitaning katta qismi IESdagi avariya oqibatida elektr energiyasisiz qolgan. Chita.ru onlayn-nashri yozishicha, shaharning bir nechta tumanlari, jumladan: Ostrov, Severniy, Tsarskiy, Oktyabrskiy, Ugdan, MJK hududi, Biofabrika, shuningdek markazdagi ayrim ko‘chalarda elektr o‘chgan.

Nashr shahar aholisiga tayanib, isitish batareyalaridagi harorat pasaygani haqidagi xabarlarni ham keltiradi. Portal Chita IES ustida quyuq tutun ko‘tarilayotganini aks ettirgan suratni ham e’lon qilgan.

5 fevral kuni mahalliy vaqt bilan taxminan ertalab soat 9 larda Baykalorti gubernatori Aleksandr Osipov Telegram’da Chitadagi IES-1da avariyadan keyin “energiya ta’minoti bir necha soat ichida tiklanganini” ma’lum qildi. “Soat 4:47 da barcha iste’molchilar ulandi. Barcha ijtimoiy obektlar odatdagi tartibda ishlayapti”, — dedi u.

Shu bilan birga, Osipov ba’zi shahar aholisi hali ham “batareyalar sovuq”ligi haqida xabar berayotganini qo‘shimcha qildi va shunday murojaatlarning har birini “alohida tarzda ishlab chiqish”ga va’da berdi.

Bundan oldin “TGK-14”ning “Chitinskaya generatsiya” filiali direktori Andrey Chebikin Chita.ru’ga IESda avariyaviy holat yuz bergani, natijada iste’molchilarning bir qismi o‘chirilganini aytgan. U internetda tarqalayotgan “transformator portladi” degan ma’lumotni rad etgan. “Avariyaviy tizimlar ishladi, tizim ishga tushdi”, — deb aniqlik kiritgan u.

Chita.ru tushuntirishicha, gap podstansiyalarda yig‘ma shinalarning parallel ishlash rejimi haqida ketmoqda. Bu rejim elektr ta’minoti ishonchliligini oshirish uchun qo‘llanadi: “U iste’molchilarni o‘chirmasdan yuklamani ko‘chirish imkonini beradi, biroq qisqa tutashuv toklarining oshishi bilan birga kechadi”.

The Moscow Times onlayn-nashri eslatishicha, Chitadagi blekaut Rossiyada kommunal avariyalar soni ko‘payib borayotgan bir paytda sodir bo‘lgan. “Novaya gazeta. Yevropa” esa hisob-kitob qilib, 2025 yil dekabridan 2026 yil yanvarigacha Rossiyada kamida 2200 marta odamlarni asosiy kommunal xizmatlarsiz qoldirgan avariyalar haqida xabar qilinganini aytgan. “Yanvar oyida ular haqida kamida 1280 marta yozilgan, bu o‘tgan yilning yanvar oyiga nisbatan deyarli ikki baravar ko‘p”, — deyiladi nashrda.

Mualliflar xulosasiga ko‘ra, “Rossiya bo‘ylab tarmoqlarning eskirishi o‘rtacha 40 foizga yetgan, ayrim hududlarda esa 80 foizgacha — bu tez-tez avariyalarga olib kelmoqda. Shu bilan birga, rejalarga ko‘ra, 2028 yilga borib uy-joy kommunal xo‘jaligiga xarajatlar 2025 yilga nisbatan hatto 2 foizga kamayishi ko‘zda tutilgan”.