Pokiston poytaxti Islomoboddagi masjidda kuchli portlash sodir etildi

Pokiston poytaxti Islomoboddagi masjidda 6 fevral kuni kuchli portlash ro‘y berdi. So‘nggi ma’lumotlarga ko‘ra, 31 kishi halok bo‘ldi, 200 nafarga yaqini jarohatlandi.

Politsiyachilar aniqlik kiritishicha, portlash juma namozidan keyin sodir etilgan.

Mahalliy nashrlarga ko‘ra, masjidning kirish qismida shubhali shaxs to‘xtatilganida, uning badaniga o‘rnatilgan portlovchi qurilma harakatga keltirilgan.

«Terrorchi darvoza oldida to‘xtatilgan va u o‘zini portlatib yuborgan», – degan AFP manbasi anonimlik sharti bilan.

O‘tgan yil noyabrida Islomobodda ro‘y bergan portlash oqibatida 12 kishi halok bo‘lgandi. Politsiyachilar shahar sudi binosi yaqinida ro‘y bergan portlashni xudkush tomonidan sodir etilgan terakt deb baholagandi.

O‘shanda portlash uchun javobgarlikni hech bir guruh o‘z zimmasiga olmagan, ammo CNN manbalari bu hujum «Tolibon»ga aloqador jangarilar tomonidan amalga oshirilganini ma’lum qilgandi.

Shialar 241 million aholiga ega ushbu mamlakatda diniy ozchilikni tashkil etadi, ushbu qatlam oldin ham ko‘p marta bu kabi hujumlar nishoniga aylangan.

Ammo mamlakat poytaxtida portlashlar kam uchraydigan holat hisoblanadi. Bosh vazir Shahboz Sharif ushbu teraktni qoralab bayonot berdi.

Prezident Shavkat Mirziyoyev Islomobod shahridagi masjidda sodir bo‘lgan terrorchilik harakati oqibatida ko‘plab insonlarning halok bo‘lgani hamda jiddiy jarohat olgani munosabati bilan Pokiston prezidenti Asif Ali Zardoriy va bosh vaziri Shahboz Sharifga ta’ziya yo‘lladi. Davlat rahbari Pokiston xalqiga, marhumlarning oila a’zolari va yaqinlariga hamdardlik bildirib, jarohatlanganlar tez fursatda sog‘ayib ketishini tiladi.