Anapada talaba Sanoat texnikumi hollida o‘t ochdi. U ikki stvolli (qo‘shog‘iz) miltiqdan 13 bor o‘q uzgan, deb xabar berdi Rossiyadagi kuchishlatar tuzilmalarga yaqin bo‘lgan telegram-kanallar. Qurol talabaning qarindoshlaridan biriniki bo‘lgan. Hujum qilgan shaxs qo‘lga olingan, u hodisadan keyin qo‘lini ko‘tardi va politsiyaga taslim bo‘ldi, deb xabar berdi «ChP Anapa» telegram-kanali. Tergov qo‘mitasi holat yuzasidan jinoiy ish ochilganini ma’lum qildi.
Texnikum qo‘riqchisi o‘ldirilgan. Krasnodar o‘lkasi gubernatori Veniamin Kondratev qo‘riqchi «zarbani o‘ziga qabul qilib, zudlik bilan harakat qilgani va huquq-tartibot organlarini chaqirgani» hamda hujum qilgan shaxsni texnikumga kiritmaganini ma’lum qilgan. Yana ikki kishi o‘rtacha og‘irlikda jarohat olgan.
Texnikumga 17 yoshli o‘smir hujum uyushtirgan. Kuchishlatar tuzilmalarga yaqin bo‘lgan telegram-kanallar yozishicha, u Ilya O. bo‘lib, uning familiyasi ochiqlanmayapti. «Ostorojno, novosti» ma’lumotiga ko‘ra, Ilya 2025 yilda ijtimoiy tarmoqlarda o‘quv muassasalariga qilingan hujumlar bilan bog‘liq kontentlarni joylashni boshlagan. Bir necha kun muqaddam u tiktokdagi sahifasi tavsifidagi yozuvni «Gunohi yo‘q odam bo‘lmaydi» so‘zlariga o‘zgartirib qo‘ygan.
Yozishmalariga qaraganda, ushbu o‘smir texnikumga hujumni kamida 7 yanvardan buyon rejalashtirib kelgan, deb yozadi «Ostorojno, novosti». Avvaliga Ilya hujumni 20 fevral kuni amalga oshirmoqchi bo‘lgan. U otishmani go‘yoki pora berganiga qaramay, o‘ziga diplom berilmagani tufayli uyushtirgani haqidagi versiya ham bor. Bu haqda «ChP Anapa» telegram-kanali talabalardan biriga tayanib xabar bergan. Bu ma’lumot tasdig‘ini topmagan.
Hujumdan bir necha oy oldin – 2025 yil avgustida – texnikumda aksilterror mashg‘ulotlar o‘tkazilgandi, deb xabar beradi «Agenstvo». Texnikum mashg‘ulotlar «muvaffaqiyatli o‘tgani», kollektiv «favqulodda vaziyatlar yuzaga kelganda qanday harakatlanish bo‘yicha yuqori tayyorgarlik» namoyish etgani haqida hisobot e’lon qilgan.
