Ispaniya BMT orqali Kubaga gumanitar yordam yubordi

Ispaniya Birlashgan Millatlar Tashkiloti (BMT) tizimi orqali Kubaga oziq-ovqat va eng zarur tibbiy mahsulotlar ko‘rinishida gumanitar yordam taqdim etadi. Bu haqda dushanba kuni, 16 fevralda Ispaniya TIV Madriddagi uchrashuvdan so‘ng ma’lum qildi. Uchrashuvda Ispaniya tashqi ishlar vaziri Xose Manuel Albares kubalik hamkasbi Bruno Rodriges bilan muzokara olib borgan.

Rodriges X ijtimoiy tarmog‘ida Ispaniya va Kuba “ikki davlat manfaatlari yo‘lida siyosiy, iqtisodiy va savdo muloqotini, shuningdek hamkorlikni mustahkamlash” niyatida ekanini yozdi. Avvalroq Kuba Meksikadan 800 tonna gumanitar yordam olgan edi. O‘tgan hafta bu yuklar orol davlatiga ikki harbiy kema orqali yetkazib berilgan.

Kubadagi iqtisodiy va energetik inqiroz AQSh tomonidan neft yetkazib berishning bloklanishi sabab sezilarli darajada kuchaydi. Qo‘shma Shtatlarning Kubaning eng muhim neft yetkazib beruvchisi va eng yaqin ittifoqchisi bo‘lgan Venesuelaga hujumi hamda uning rahbari Nikolas Maduroning qo‘lga olinishi ortidan Karakas kubaliklarga neft yetkazib berishni to‘xtatdi.

Yanvar oxirida AQSh prezidenti Donald Tramp Kubani “AQSh milliy xavfsizligiga istisno darajadagi tahdid” deb atadi va Havanaga neft yoki neft mahsulotlarini yetkazib berishda davom etadigan barcha davlatlarga jarima bojlarini joriy etish bilan tahdid qildi.

13 fevral kuni BMT Kubadagi inqiroz tobora chuqurlashib borayotgani yuzasidan xavotir bildirdi. Aholisi 10,9 million bo‘lgan orol davlat tez-tez elektr uzilishlari, shuningdek oziq-ovqat va dori-darmon tanqisligiga duch kelmoqda. Shu munosabat bilan hukumat favqulodda choralarni, jumladan yonilg‘i savdosiga cheklovlar va jamoat transporti sohasida qisqartirishlarni joriy etdi.

So‘nggi ikki yil ichida Kuba Xitoy ko‘magida quyosh elektr stansiyalari qurilishini kengaytirishga katta mablag‘ yo‘naltirgan bo‘lsa-da, ulardan olinayotgan samaradorlik mamlakatning elektr energiyasiga bo‘lgan ehtiyojini qondirishdan yiroq. Orolning energiya ta’minoti hamon sovet davridan qolgan, ishonchliligi past issiqlik elektr stansiyalariga bog‘liq.

Bu esa Havananing energiya tashuvchilarni import qilishga qattiq ehtiyoj sezayotganini anglatadi. Mamlakatning o‘zida ishlab chiqariladigan mazut ehtiyojning taxminan 40 foizini qoplaydi, u benzinga qayta ishlanmaydi va faqat elektr stansiyalari uchun ishlatiladi.