“Hokimiyatga 1 mln yetkazishimiz buyurildi” – Surxondaryoda o‘qituvchilardan majburiy pul yig‘ilmoqda

Surxondaryo viloyati Jarqo‘rg‘on tumanida o‘qituvchilardan majburiy pul yig‘ilmoqda. Bu haqda Kun.uz’ga tumandagi 33-umumta’lim maktabi pedagoglari ma’lum qildi.

Ularga ko‘ra, tuman hokimligi hamda maktabgacha va maktab ta’limi bo‘limi tomonidan turli majburiy pul yig‘imlari “o‘ylab topilmoqda”.

“Ayni vaqtda “Ramazon ehsoni” niqobi ostida turli sabablar bilan pul yig‘ilyapti. Qaysidir maktab ta’miriga ham, qaysidir kam ta’minlangan oilalarga ham biz pul yig‘ib beradigan bo‘lsak, davlat tomonidan ajratilayotgan pullar, turli jamg‘armalardagi mablag‘lar qayerga ishlatilmoqda unda?” deyiladi pedagoglar murojaatida.

Kun.uz maktab o‘qituvchilari bilan bog‘landi. Ular 20 fevral kuni direktor Oysara Uzoqova tomonidan maktabning Telegram’dagi guruhida berilgan “tezkor topshiriq”ni tahririyatga taqdim etishdi. Unda direktor o‘qituvchilar har biri 25 ming so‘mdan yetkazishi kerakligini tayinlagan.

“Xabarlaringiz bor, bizga 5 ta kambag‘al oila tushgan edi. Bizga tushgan oila Qushtepa mahallasidan ekan. Hozir menga hokim o‘rinbosari Anvar Rajabov telefon qildi. Ertaga ertalab soat 9:00 gacha 1 mln pulni hokimiyatga olib borib berishimiz kerak ekan!

Ikkinchi topshiriq! 66-maktabning hamma sinf xonalarini bugun hamma maktabga bo‘lib chiqibdi. Remont qilish kerak ekan. Ertaga tanish direktoringiz bo‘lsa, astagina telefon qilib so‘rangizlar, aytadi. Bizga ham bitta xona berilibdi. 400 000 so‘mdan tushibdi.

Shu uchun ertaga ertalab soat 8:30 gacha Ramazon oyida hammamizdan ehson, 25 000 so‘mdan Abdumalikka yetkazinglar, kechikmasdan. Darsim yo‘q edi, xabarim yo‘q edi demangizlar. Hamma maktab va bog‘chalarga bir xil topshiriq berilyapti. So‘rab ko‘ringizlar!!! Bozorligi ro‘yxati bilan tashlab berildi”, deyilgan direktor topshirig‘ida.

Oysara Uzoqova topshiriqni bergan hokim o‘rinbosari sifatida Anvar Rajabov ismini keltirgan. Rajabov Anvar Uralovich Jarqo‘rg‘on tumani hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari hisoblanadi.

Kun.uz holat yuzasidan izoh olish maqsadida maktab direktori Oysara Uzoqova bilan bog‘landi.

Ayni vaqtda Toshkent shahrida o‘qishda ekanini bildirgan direktor o‘qituvchilardan pul yig‘ish bo‘yicha topshiriq berganini inkor qilmadi. Shuning barobarida, Oysara Uzoqova ushbu topshiriq ijrosi amalga oshmaganini, ya’ni pedagoglardan pul yig‘ilmaganini, Toshkentda bo‘lmaganida “bu xarajatni” o‘z hisobidan qoplab yuborishi mumkin bo‘lganini ma’lum qildi.

Avvalroq Jarqo‘rg‘on tumani hokimi o‘rinbosarlaridan biri tezkor tadbirda qo‘lga olingandi.