Farg‘ona bog‘chalaridagi zaharlanish: ta’minotchi korxona hokimlik imtiyozidan foydalangan

2024 yil 25 iyulda Farg‘ona viloyati hokimi Xayrullo Bozorov qarori bilan Quvasoy shahridagi davlat bog‘chalarida keytering tizimi joriy etilgandi. O‘shanda «Garden Catering Trade»ning ovqat tayyorlash va yetkazib berish bo‘yicha takliflari ma’qullangan. Loyiha ijobiy baholangan taqdirda, tizimni Farg‘ona shahrida ham joriy etish rejalashtirilgan.

Qaror qabul qilinganida ta’minot korxonasi tashkil etilganiga bir oydan biroz ko‘proq vaqt bo‘lgandi.

Viloyat hokimligi 2024 yil 30 iyulda tayyor taomlarni yetkazib berish tizimi (keytering) sinov tariqasida joriy etilayotganini ma’lum qilgan. 1 avgustdan boshlab «Garden Catering Trade» kompaniyasi tender va tanlovsiz besh oy davomida bog‘chalarga oziq-ovqat yetkazib berish huquqini qo‘lga kiritgan.

«Turkiyalik hamkorlar bilan tashkil etilgan Garden Catering qo‘shma korxonasida Jahon sog‘liqni saqlash tashkiloti tomonidan tavsiya etilgan sog‘lom ovqatlanish talablari asosida bolalar uchun belgilangan ratsionda 100 turdan ziyod taomlar, salatlar hamda desertlar tayyorlanishi, korxonaga 12 nafar turkiyalik yuqori malakali shef-oshpazlar hamda 2 nafar sog‘lom ovqatlanish bo‘yicha injyener-texnologlar jalb etilgani sinov tajribasi uchun ushbu kompaniyani tanlab olishda asos bo‘lgan», – deyilgandi xabarda.

«Garden Catering Trade» MChJ avvaliga qo‘shma korxona shaklida, Iqboljon Bozorov va Yildirim Ademning teng sherikligida ta’sis etilgan. 

Ayni paytda MChJ qo‘shma korxona emas va uning 100 foizlik ulushiga Iqboljon Bozorov egalik qiladi.

Keyinroq ushbu korxona kutilganidek Farg‘ona shahridagi bog‘chalarga ham xizmat ko‘rsatishni boshlaydi.

Korrupsiyaga qarshi kurashish agentligining e’tiborsiz qoldirilgan taqdimnomasi

Korrupsiyaga qarshi kurashish agentligi 2024 yil iyul oyida Farg‘ona viloyatidagi davlat maktabgacha ta’lim muassasalarida ovqatlanishni tashkil etishda qoidabuzarliklarni aniqlagan. Bu haqda agentlik Kun.uz’ga ma’lum qildi.

O‘shanda Farg‘ona viloyati davlat maktabgacha ta’lim tashkilotlarida ovqatlantirishni tashkil etish holati o‘rganilgan. O‘rganish natijalariga ko‘ra, Quvasoy va Farg‘ona shaharlarida autsorsing usulida sog‘lom ovqatlantirishni tashkil etish jarayonida davlat xaridlari to‘g‘risidagi qonunchilik talablariga rioya etilmagani aniqlangan.

Xususan, Farg‘ona viloyati hokimining 2024 yil 25 iyuldagi 402-11-0-Q/24-sonli qarori bilan «Garden Catering» MChJ Quvasoy va Farg‘ona shaharlaridagi maktabgacha ta’lim tashkilotlariga taom yetkazib beruvchi sifatida to‘g‘ridan to‘g‘ri tanlangani ma’lum bo‘lgan. Agentlikka ko‘ra, mazkur qaror «Davlat xaridlari to‘g‘risida»gi qonun hamda Vazirlar Mahkamasining 2019 yil 25 iyuldagi 626-son qarori talablariga zid qabul qilingan.

Shuningdek, 626-sonli qarorga muvofiq autsorserlar umumiy ovqatlanish xizmati sohasida kamida bir yillik ish tajribasiga ega bo‘lishi shart. Biroq «Garden Catering Trade» MChJ 2024 yil 21 iyun kuni davlat ro‘yxatidan o‘tkazilgan bo‘lib, shartnoma tuzilgan vaqtda belgilangan tajriba talablariga javob bermagan.

Aniqlangan holatlar yuzasidan agentlik tomonidan Farg‘ona viloyati hokimligiga qonunbuzilishlarni bartaraf etish, xizmat ko‘rsatuvchini raqobatli xarid asosida tanlash, mas’ul shaxslarga nisbatan chora ko‘rish hamda kelgusida bunday holatlarning oldini olish bo‘yicha taqdimnoma kiritilgan.

Biroq hokimlik tomonidan taqdimnomada ko‘rsatilgan qonunbuzilishlarni bartaraf etish bo‘yicha amaliy choralar ko‘rilmagan. Tergovga qadar tekshiruv materiallarida zaharlanish manbasi bo‘lgan oziq-ovqat aynan mazkur korxona tomonidan yetkazib berilgani qayd etilgan.

«Farg‘onadagi vaziyat korrupsiyaga qarshi kurashish qonunchiligi normalariga bepisand qarash va nazorat organlari ko‘rsatmalarini ijro etmaslik qanday oqibatlarga olib kelishini yaqqol ko‘rsatib turibdi. Tender jarayonlarini affillangan shaxslar foydasiga chetlab o‘tish nafaqat budjetga zarar yetkazadi, balki bolalar hayoti va sog‘lig‘ini to‘g‘ridan to‘g‘ri xavf ostida qoldiradi», – deya qayd etadi agentlik.

Eslatib o‘tamiz, 20 fevral kuni Farg‘ona shahridagi 2-, 58- va 61-sonli davlat maktabgacha ta’lim tashkilotlarining jami 62 nafar tarbiyalanuvchisi o‘tkir diareya tashxisi bilan shifoxonaga yotqizilgani haqida xabar qilingandi.

Holat yuzasidan Jinoyat kodeksining 257−1-moddasi (Sanitariyaga oid qonunchilikni buzish) bilan jinoyat ishi qo‘zg‘atilgan.