Jinoyat ishlari bo‘yicha Piskent tuman sudi raisi Muzaffar Bozorov YTHda jarohatlanib, shifoxonaga yotqizildi.
Ijtimoiy tarmoqlarda mazkur YTHga oid xabar tarqaldi. Unda Angren shahrida Toyota Damas mashinasi ketidan kelib urgani hamda Damas yo‘l chetida turgan Muzaffar Bozorovga borib urilgani aytilgan.
Sudyalar oliy kengashi holatga munosabat bildirdi. Ma’lum qilinishicha, YTH 22 fevral kuni soat taxminan 9:30 larda sodir bo‘lgan. Shu vaqtning o‘zida Toshkent viloyat sudi mutasaddilari Sudyalar oliy kengashini xabardor qilgan hamda shifoxonaga borib, sudyaning holidan xabar olishgan.
“Sudyalar oliy kengashi vaziyatni nazoratga olgan. Ayni paytda ham bemorning ahvoli haqida tegishli ma’lumotlar kelib turibdi. Shifokorlarning bugun bergan ma’lumotiga ko‘ra, bemorning ahvoli yaxshi tomonga o‘zgargan”, deyiladi xabarda.
Qo‘shimcha qilinishicha, YTHga belgilangan tartibda huquqiy baho beriladi.
