Eron JChda ishtirok etmasligi ma’lum qilindi

Futbol bo‘yicha Eron milliy jamoasi 2026 yil yozida AQSh, Meksika va Kanada mezbonligida o‘tadigan jahon chempionatida ishtirok etmasligi mumkin.

Mamlakat sport vaziri Ahmad Dunyomoli OAVga bergan intervyusida bunga xavfsizlik masalalari va AQSh bilan urushni sabab qilib keltirgan.

«Bu korrupsiyalashgan hukumat rahbarimizni o‘ldirganidan so‘ng, jahon chempionatida ishtirok etishimizga imkon beradigan hech qanday sharoit qolmadi. Eronga qarshi olib borilgan dushmanlik harakatlari fonida bizga qarshi ikki marta urush olib borildi va bir necha ming fuqaromiz o‘ldirildi. Bunday sharoitda bizda  ishtirok etish imkoniyati yo‘q», – degan u TV2 telekanali efirida.

Hozircha bu qanchalik yakuniy qaror ekani ma’lum emas. Hozircha Eron futbol federatsiyasi va FIFA bu xabar yuzasidan izoh bermadi.

Jahon chempionati 11 iyundan 19 iyulga qadar AQSh, Kanada va Meksika yashil maydonlarida bo‘lib o‘tadi. Eron milliy jamoasi Osiyo saralashi uchinchi bosqichida O‘zbekiston bilan bir guruhda qatnashgan va birinchi o‘rin bilan mundial yo‘llanmasini qo‘lga kiritgandi. Qur’a natijalariga ko‘ra Eronga G guruhida Belgiya, Misr va Yangi Zelandiya jamoalar raqib bo‘lgandi. Eronliklarning guruh bosqichidagi barcha o‘yinlari AQShda, ikki o‘yin Los-Anjyelesda, yana bittasi – Sietlda bo‘lib o‘tishi belgilangan.