Poytaxtning umumiy qiyofasini yaratishga qaratilgan shahar dizayn-kodi rasman tasdiqlandi

Dizayn-kod o‘tgan yil dekabrda Citymakers International tomonidan ishlab chiqilgandi. Xalq deputatlari Toshkent shahar kengashi uni rasman tasdiqlashga oid qarorni qabul qildi. Endilikda hujjat bilan shaharning vizual identifikatsiyasiga oid qoidalar belgilanadi. Ya’ni poytaxtning tashqi ko‘rinishi dizayn-kodga muvofiq o‘zgartiriladi.

Foto: Toshkent shahar hokimligi

Toshkent shahrining yagona qiyofasini yaratish va jamoat joylarini rivojlantirishga qaratilgan dizayn-kod xalq deputatlari Toshkent shahar kengashi tomonidan rasman tasdiqlandi. Bu haqda Urbanizatsiya va uy-joy bozori milliy qo‘mitasi xabar berdi.

Dizayn-kod 2025 yil dekabrida Toshkent Invest kompaniyasi buyurtmasiga ko‘ra, Citymakers International tomonidan ishlab chiqilgandi. Hujjatda poytaxt hokimiyatining takliflari ham inobatga olingani aytilmoqda.

Ma’lumot uchun, Citymakers International – shaharlarni rivojlantirish loyihalarini ishlab chiqish va ularni amalga oshirish jarayonini kuzatib borish bilan shug‘ullanuvchi tahliliy va loyiha markazi hisoblanadi. Kompaniya Moskva shahridagi Zaryade Park loyihasini ishlab chiqishda ishtirok etgan. Bu park zamonaviy arxitekturaning katta yutug‘i va Rossiya hamda uning poytaxtining yangi ramzi deb ataladi.

Endilikda yagona dizayn-kod bilan jamoat joylarini rejalashtirish, shahar dizayni elementlarini joylashtirish, tijorat obektlarini bezash hamda shaharning vizual identifikatsiyasiga oid qoidalar belgilanadi.

Unda dizayn elementlari kataloglari, turistik va gastronomik ko‘chalar ro‘yxati, shuningdek, obodonlashtirish va sanitariya tozaligi uchun ekspluatatsiya yig‘imi miqdori ham kiritilgan.

Dizayn-kodini tartibga solishning asosiy yo‘nalishlari:

binolar arxitekturasi: materiallar, rang yechimlari, fakturalar, fasadlar, vitrinalar va kirish qismlarini bezash;
peshlavhalar va reklama: o‘lchamlari, shriftlari, yoritilishi va ruxsat etilgan joylashuvi;
obodonlashtirish: trotuarlar, ko‘cha yoritkichlari, o‘rindiqlar, chiqindi qutilari, ko‘kalamzorlashtirish elementlari;
ko‘cha elementlari: to‘siqlar, yo‘l ko‘rsatkichlari, jamoat transporti bekatlari, kichik me’moriy shakllar;
tarixiy muhit: yodgorliklar va tarixiy hududlarning me’moriy qiyofasini saqlab qolish chora-tadbirlari.

Hujjatga ko‘ra, poytaxtdagi tuman hokimliklari ikki oy ichida bosh arxitektorlar nazorati ostida jamoat joylari chegaralari sxemalarini ishlab chiqishi kerak.

Arxitektura va shaharsozlik kengashi mavsumiy savdo, xizmat ko‘rsatish obektlari va qurilish-montaj ishlarini loyihalashtirishda dizayn-kod talablariga rioya etilishini nazorat qiladi.

Toshkent shahar hokimligi qurilish, ta’mirlash va rekonstruksiyaga ruxsat berishda, shuningdek yo‘llar, piyodalar yo‘lakchalari va boshqa infratuzilma elementlari bilan bog‘liq ishlar amalga oshirilganda ushbu qoidalarga rioya etilishini ta’minlaydi.

To‘rt oy ichida poytaxt hokimiyati jamoat joylarida manzil ko‘rsatkichlari va navigatsiya elementlarini tasdiqlangan standartlar asosida o‘rnatish va almashtirish dasturini ishlab chiqadi.

Shu bilan birga, dizayn-kod talablari kapital qurilishga oid shaharsozlik normalari va qoidalariga integratsiya qilinadi.

Bino tashqi ko‘rinishini o‘zgartirish, rekonstruksiya qilish, yengil konstruksiyalar o‘rnatish, obodonlashtirish va ko‘kalamzorlashtirish ishlarini olib borish, savdo va xizmat ko‘rsatish obektlarini tashkil etish, reklama elementlarini joylashtirish, shuningdek muhandislik tarmoqlari va transport infratuzilmasini loyihalashtirish hamda modernizatsiya qilishda dizayn-kod talablariga rioya qilish tashkilotlar, yuridik va jismoniy shaxslar uchun majburiy bo‘ladi. Kengash qarori rasman e’lon qilinganidan uch oy o‘tgach — kuchga kiradi.