Ukraina qurolli kuchlari instruktorlari Bundesverga Rossiyadan himoyalanishni o‘rgatadi

Ukrain harbiy instruktorlari Bundesverga Rossiyaning ehtimoliy hujumini qaytarishga tayyorgarlik ko‘rishda yordam beradi. Bu haqda Germaniya quruqlik qo‘shinlari inspektori general-leytenant Kristian Froyding Reuters agentligiga bergan va 11 mart, chorshanba kuni e’lon qilingan intervyusida ma’lum qildi. Froydingning so‘zlariga ko‘ra, dastlabki bosqichda Ukraina qurolli kuchlaridan “ikki xonali son” miqdoridagi, ya’ni o‘ndan ortiq instruktor Germaniyadagi harbiy bilim yurtlarida “bir necha hafta” davomida ishlash uchun keladi.

“Biz katta umid bog‘layapmiz, — dedi Froyding. — Hozir Ukraina harbiylari dunyoda Rossiyaga qarshi frontda haqiqiy jangovar harakatlar tajribasiga ega bo‘lgan yagona harbiylardir”. Generalning ma’lum qilishicha, Ukraina qurolli kuchlari harbiylari nemis hamkasblari bilan artilleriya, bronetank operatsiyalari, uchuvchisiz apparatlardan foydalanish va muhandislik ishlari kabi sohalardagi tajribasini bo‘lishadi.

Shu bilan birga, Germaniya quruqlik qo‘shinlari inspektori g‘arb razvedka xizmatlari baholariga tayandi. Ularga ko‘ra, Rossiya 2029 yilga borib NATOga qarshi keng ko‘lamli hujumga tayyor bo‘lishi mumkin.

“Bu deyarli ertaga degani. Bizning vaqtimiz yo‘q — dushman biz tayyorligimizni e’lon qilishimizni kutib turmaydi. Shuning uchun tayyorgarlik ko‘rish uchun har qanday imkoniyatdan foydalanishimiz kerak”, — deb ta’kidladi Froyding.

Fevral oyida Der Spiegel jurnali jangovar tajribaga ega ukrain instruktorlari Bundesver harbiylariga dronlardan foydalanish, hujumlarni qaytarish va mobil ilovalar yordamida operatsiyalar o‘tkazishni o‘rgatishi haqida yozgan edi.

2022 yil oktyabridan buyon taxminan 25 000 nafar ukrain harbiysi Germaniyada tayyorgarlikdan o‘tdi. Bu haqda dpa agentligi Bundesver vakiliga tayanib xabar berdi. Tayyorgarlik Ukrain harbiylarini o‘qitish bo‘yicha Yevropa Ittifoqi missiyasi (EUMAM) doirasida amalga oshirilmoqda. Bundesver vakilining so‘zlariga ko‘ra, hozir Germaniya armiyasi Saksoniya-Anhalt federal yeridagi harbiy poligonlardan birida ukrain harbiylariga Leopard 1A5 asosiy jangovar tanklarini va Biber zirhli ko‘prik qo‘yuvchi texnikalarini boshqarishni o‘rgatmoqda.

Bu Ukraina va Germaniya o‘rtasidagi harbiy hamkorlikning yagona yo‘nalishi emas. Masalan, dekabr oyida ukrain dron ishlab chiqaruvchisi Frontline Robotics va Germaniyaning mudofaa kompaniyasi Quantum Systems Ukraina Mudofaa vazirligi buyurtmasi asosida jangovar dronlar ishlab chiqarishni boshlashi ma’lum bo‘lgan edi. Bu maqsadda Yevropadagi uchuvchisiz uchish apparatlarini ishlab chiqarish bo‘yicha birinchi to‘liq avtomatlashtirilgan sanoat liniyasi yaratiladi.