Tojikistondan suzib o‘tgan shaxs 5 kilodan ortiq “gashish” bilan qo‘lga olindi

Ma’lum bo‘lishicha, Tojikiston hududidan Sirdaryo daryosi orqali O‘zbekiston davlat chegarasini noqonuniy ravishda buzib o‘tgan Bekobod shahrida yashovchi, 1998 yilda tug‘ilgan fuqaro qo‘lga olingan. Uning yoni tekshirilganda 5 kilogramm 31 gramm “gashish” giyohvand moddasi borligi aniqlanib, protsessual tartibda rasmiylashtirib olindi.

Shuningdek, Davlat xavfsizlik xizmatining Toshkent viloyati bo‘yicha boshqarmasi va bojxona idoralari hamkorligida poytaxtda faoliyat yurituvchi xususiy tibbiy klinikalardan birida o‘tkazilgan tekshiruv davomida yana bir holat fosh etildi. Xona xolislar ishtirokida ko‘zdan kechirilganda, mazkur shifoxonada davolanayotgan 1970 yilda tug‘ilgan shaxsga tegishli 1 kilogramm 367 gramm “gashish” moddasi borligi ma’lum bo‘ldi.

Bundan tashqari, DXX Farg‘ona viloyati bo‘yicha boshqarmasi va ichki ishlar organlari xodimlari hamkorligida o‘tkazilgan tezkor tadbirda Farg‘ona tumanida yashovchi, 1998 yilda tug‘ilgan shaxs muqaddam jinoiy sherigi tomonidan xufiya joyga qoldirib ketilgan 1 kilogramm 21 gramm “gashish” moddasini olgan vaqtida ushlandi. Tekshiruv jarayonida uning yashash xonadonidan 2 gramm “opiy” moddasi ham ashyoviy dalil sifatida olindi.

Olib borilgan chora-tadbirlar natijasida mazkur shaxsning jinoiy sherigi hisoblangan Farg‘ona shahrida yashovchi, 1998 yilda tug‘ilgan fuqaro ham qo‘lga olindi.

Navbatdagi holatda esa oldindan kuzatuvga olingan Qo‘shtepa tumanida istiqomat qiluvchi, 1999 yilda tug‘ilgan fuqaro o‘zining “Nexia” rusumli avtomashinasida Marg‘ilon shahri hududida harakatlanib ketayotgan vaqtda avtoulovdan 996 gramm “gashish” moddasini uloqtirib, voqea joyidan qochishga uringan. U ashyoviy dalillar bilan ushlandi.

Hozirda ushbu qonunbuzarlik holatlari yuzasidan Jinoyat kodeksining tegishli moddalari bilan jinoyat ishlari qo‘zg‘atilib, gumonlanuvchilarga nisbatan “qamoq” ehtiyot chorasi qo‘llangan. Tergov harakatlari olib borilmoqda.

Mas’ul idoralar fuqarolarni bu kabi qonunbuzilish holatlari haqida Davlat xavfsizlik xizmatining 1520 qisqa raqami orqali xabar berishga chaqirdi. Murojaat etuvchining shaxsi sir saqlanishi kafolatlanadi.