Shavkat Mirziyoyev Imom Buxoriy majmuasini ziyorat qildi

Prezident Shavkat Mirziyoyev 19 mart kuni Samarqand viloyati Payariq tumanida joylashgan Imom Buxoriy majmuasiga tashrif buyurdi.

Ziyoratgoh markazida joylashgan buyuk hadisshunos Imom Buxoriy hazratlarining tabarruk maqbarasi ziyorat qilindi. Tashrif chog‘ida Qur’on oyatlari tilovat etilib, duo o‘qildi.

Davlat rahbari muborak Ramazon hayiti arafasida ulug‘ vatandosh, hadis ilmining sultoni Imom Buxoriy hazratlarining ruhi poklariga ehtirom bajo keltirilayotganini ta’kidladi.

– Buxoriy bobomiz Qur’oni karimdan keyingi eng mo‘tabar manba bo‘lgan hadislar to‘plamini yaratib, butun islom olamida yuksak obro‘-e’tiborga sazovor bo‘lgan buyuk allomadir. Muqaddas zaminimiz dunyoga ana shunday ulug‘ siymolarni bergani bilan faxrlanishga arziydi, – dedi prezident.

Shuningdek, el-yurtning fidokorona mehnati bilan barpo etilgan mazkur ziyoratgoh Imom Buxoriy hazratlarining olamshumul mavqeiga munosib ekani qayd etildi.

Tashrif davomida ushbu tabarruk maskan barcha yurtdoshlar uchun muborak bo‘lishi tilab, ezgu duolar qilindi.