O‘zbekiston elchixonasi diplomatlari Rossiyaning Tula viloyatidagi Xorijiy fuqarolarni vaqtinchalik saqlash markaziga tashrif buyurdi.
Tashrif davomida elchixonaning bosh konsuli Mehriddin Xayriddinov muassasada saqlanayotgan o‘zbekistonliklarning yashash va ovqatlanish sharoitlari bilan yaqindan tanishdi. Aniqlangan muammo va kamchiliklar bo‘yicha Rossiya tomoni bilan qator muzokaralar o‘tkazdi.
Markaz rahbariyati va Rossiya Ichki ishlar vazirligining viloyat boshqarmasi vakillari bilan bo‘lib o‘tgan muloqotda fuqarolarimizning hujjatlarini tezkorlik bilan rasmiylashtirish va ularni qisqa fursatda vatanga qaytarish masalalari muhokama qilindi.
Muzokaralar natijasida markazda uzoq vaqtdan buyon saqlanib kelayotgan bir guruh fuqarolarni yaqin kunlarda O‘zbekistonga qaytarish bo‘yicha kelishuvga erishildi.
