Turkiya kurdlarni Eronga qarshi urushga qo‘shilishdan ogohlantirdi – OAV

Turkiya AQSh, Iroq va kurd guruhlarini agar kurdlar Eronga qarshi operatsiyalarga jalb etiladigan bo‘lsa, ularga nisbatan harbiy choralar ko‘rishi haqida ogohlantirdi. Bu haqda o‘z manbalariga tayanib Türkiye gazetasi xabar qildi.

Nashrning yozishicha, Eronga hujumlar boshlangach, Isroil Anqara terrorchi tashkilot deb tan olgan Kurdiston ishchilar partiyasi va uning Erondagi PJAK qanoti bilan ularning Eronga qarshi urushga qo‘shilishi bo‘yicha kelishuvga erishishga urinmoqda. "Mossad" razvedka xizmati bu guruhlarning qo‘mondonlari bilan muloqot o‘tkazgan. 

Gazetaning ma’lumot berishicha, mart oyi boshida Turkiya prezidenti Rajab Toyyib Erdo‘g‘an va AQSh prezidenti Donald Tramp o‘rtasidagi telefon orqali muloqotda bu mavzu muhokama qilingan. Erdo‘g‘an Eronga qarshi urushda kurd guruhlaridan foydalanish g‘oyasiga keskin qarshi chiqqan. Kurd tashkilotlariga esa agarda urushda ishtirok etadigan bo‘lishsa, Turkiya ularga "ilgari Suriyada bo‘lgani kabi zarba berishi" haqida aytilgan. 

Shuningdek, qayd etilishicha, turkiyalik mansabdorlar Shimoliy Iroqqa tashrif buyurib, Anqaraning prinsipial pozitsiyasini ma’lum qilishgan va kurd tashkilotlari Eronga hujumlarda ishtirok etgan taqdirda Turkiya ularga nisbatan harbiy javob berishga tayyorligini bildirishgan.