Shveytsariya kelgusi 4 yilga mo‘ljallangan mintaqaviy loyihalarga start berdi va dastur ushbu davlat budjetidan qoplanadi. Kun.uz bilan gaplashgan elchi Konstantin Obolenskiyga ko‘ra, bu beminnat yordam hamda evaziga Shveytsariya mintaqadan hech nima kutmaydi.
Elchi Konstantin Obolenskiyga ko‘ra, bu Shveytsariyaning mintaqadagi barqarorlikning rivojlanishi, iqtisodiy o‘sishini qo‘llashini isbotlamoqda.
Ma’lum bo‘lishicha, dastur ikkita asosiy yo‘nalish asosida qurilgan. Birinchisi suv va energiya. “Blue Peace Central Asia” loyihasi orqali suv resurslarini boshqarishda hamkorlik nazarda tutilgan.
Yana bir eng muhim nuqta esa – iqlim o‘zgarishi, Shveytsariya loyihasida shaharsozlikni nazoratga olish orqali iqlim o‘zgarishiga qarshi kurash taklif qilinmoqda.
Toza energiya, energiya samaradorligi va mintaqaviy energiya savdosini rivojlantirish ham birinchi yo‘nalish qismiga kiradi.
-Dasturni qanday amalga oshirasiz va boshqalardan, masalan, Yevropa Ittifoqining Markaziy Osiyo uchun loyihalaridan sizniki qanday farq qiladi?
“Biz aslida 1990 yillarda, Shveytsariya mustaqil O‘zbekistonni tan olganidan ko‘p o‘tmay ish boshlaganmiz. Biz bu yerda elchixona ochdik va O‘zbekiston bilan rivojlanish sohasida hamkorlikni boshladik. Ishonchim komil, bu Shveytsariyaning kuchli tomonlaridan biri edi. Shuningdek, Shveytsariyaning yashirin hech qanday maqsadi yo‘q. Ya’ni biz buni O‘zbekiston bilan savdo aloqalarini yaxshilash yoki shunga o‘xshash maqsadlarda qilmaymiz. Asosiy xohishimiz – dunyoni yanada xavfsizroq qilish. Shveytsariya aslida shuni xohlaydi va bu O‘zbekistonda ham ko‘zlayotgan maqsadimiz hisoblanadi”, - deydi Shveytsariyaning O‘zbekistondagi elchisi.
Loyihaning ikkinchi yo‘nalishi barqaror iqtisodiy rivojlanishni qo‘llash xususida. Ya’ni bu yo‘nalishda ish o‘rinlarini yaratish, o‘qitish, yosh tadbirkorlarga yordam berish, shaffof va normal qoidalarga asoslangan iqtisodiy o‘zgarishlarni qo‘llash, innovatsiyalarga pul tikish nazarda tutilgan.
-Bu dastur qanday moliyalashtiriladi?
“Bu shunchaki yordam emas, bu kreditlar ham emas. Bu sarmoya qilinayotgan Shveytsariya soliq to‘lovchilarining pullaridir”.
