2026 yil uch oyida «avariyalar»ning 31 foizi o‘lim bilan yakunlangani ma’lum bo‘ldi

2026 yilning uch oyi davomida respublikada 1102 ta yo‘l-transport hodisasi qayd etildi. Ularning 31,4 foizi (346 ta) inson o‘limi bilan yakunlandi. Bu haqda Ichki ishlar vazirining o‘rinbosari, Tergov departamenti boshlig‘i Ramazon Ashropov matbuot anjumanida ma’lum qildi.

Ma’lum bo‘lishicha, yo‘l-transport hodisalarining 13,6 foizi haydovchilar tomonidan piyodaga yo‘l bermaslik, 32,9 foizi belgilangan tezlikka rioya qilmaslik, 4,2 foizi haydovchini uxlab qolishi va 22,4 foizi svetoforning talablariga amal qilmaslik oqibatida sodir bo‘lgan.

Shuningdek, axborot texnologiyalari orqali sodir etilgan jinoyatlar soni 18 mingdan oshgani, ularning aksariyati fuqarolarning pul mablag‘larini elektron to‘lov tizimlari orqali o‘zlashtirish bilan bog‘liqligi ta’kidlandi.