Islom sivilizatsiyasi markazi Ginness rekordlar kitobiga kiritildi

Toshkentdagi Islom sivilizatsiyasi markazi «Eng yirik islom sivilizatsiyasi muzeyi» nominatsiyasi bo‘yicha rasman Ginness rekordlar kitobiga kiritildi, deb xabar berdi «Dunyo». Bu haqdagi sertifikat tashkilot vakili Sheyda Subashi tomonidan tantanali ravishda topshirildi.

Hazrati Imom majmuasi hududida joylashgan ushbu markaz ulug‘vor me’moriy ko‘rsatkichlari bilan ajralib turadi: hudud maydoni — 10 gektar, binoning uzunligi — 161 metr, kengligi — 118 metr, gumbazning balandligi — 65 metr, xonalarning umumiy maydoni esa qariyb 50 ming kvadrat metrni tashkil etadi. Ta’kidlanishicha, aynan shu xususiyatlar jahon rekordiga asos bo‘lgan.

Islom sivilizatsiyasi markazi prezident Shavkat Mirziyoyev tomonidan 2026 yil 17 mart kuni ochilgan edi. Markaz maydoni va qamroviga ko‘ra, dunyoda islom tarixi, madaniyati va sivilizatsiyalarini o‘rganish hamda targ‘ib etishga qaratilgan yirik majmualardan biri hisoblanadi.