Energetika vaziri blogerga qarshi: tomonlar nima deydi?

1 may kuni Yashnobod tuman sudida iqtisodchi va bloger Otabek Bakirov hamda energetika vaziri Jo‘rabek Mirzamahmudov o‘rtasidagi ish ko‘rib chiqilishi kutilgan edi. Ishga 2024 yilda Bakirov tomonidan davlat mablag‘lariga yaratilgan Auto24 ilovasi faoliyati yuzasidan bildirilgan tanqidiy fikrlar hamda uning Telegram-kanalida energetika muammolari haqida yozgan postlari asos bo‘lgan.

Avvalroq ichki ishlar idoralari ushbu murojaatlar yuzasidan jinoyat ishi qo‘zg‘atishni rad etgan. Biroq prokuratura e’tirozi bilan ish ma’muriy tartibda qayta tiklangan va sudga oshirilgan. Blogerga nisbatan Ma’muriy javobgarlik to‘g‘risidagi kodeksning 202-2-moddasi – yolg‘on axborot tarqatish alomatlari ko‘rib chiqilyapti.

1 may kuni tomonlar sud majlisiga soat 11:00 ga chaqirilgan. Jarayonni yoritish uchun jurnalistlar va huquq faollari ham yetib kelgan. Biroq uch soatga yaqin kutishdan so‘ng, sud majlisi qoldirilgani ma’lum qilindi.

Tomonlar nizo yuzasidan o‘z fikrlari bilan o‘rtoqlashdi.

Vazirlik: “Hamkorlikka tayyormiz, lekin ma’lumotlar tekshirilgan bo‘lishi kerak”

Energetika vazirligi yuridik bo‘limi boshlig‘i Oybek Qo‘chqorovning aytishicha, vazirlik jamoatchilik bilan ishlashda ochiqlik tarafdori va tanqidni inkor etmaydi. Biroq u har qanday e’lon qilinayotgan ma’lumot tekshirilgan bo‘lishi kerakligini ta’kidladi.

Shuningdek, u Auto24 ilovasi davlat tomonidan katta mablag‘ sarflab yaratilgani haqidagi fikrlarni rad etdi.

“Bu ilova oldindan mavjud platforma bo‘lgan, unga hamkorlik asosida qo‘shimcha funksiyalar kiritilgan. Uni “milliardlab mablag‘ sovurilgan loyiha” sifatida talqin qilish noto‘g‘ri”, – dedi u.

Vazirlik vakili bloger postlarida ishlatilgan ayrim iboralar, xususan “Mirzamahmudov ilovasi” degan ifoda aniq shaxsga nisbatan noto‘g‘ri tasavvur uyg‘otishini bildirdi.

“Shartnoma taklif qilingan”

Qo‘chqorovning aytishicha, vazirlik bloger bilan ochiq muloqot qilishga urinib ko‘rgan.

“Lolazor” podkastida vazirimiz tomonidan taklif ham berilgan: agar tizimni rivojlantirish bo‘yicha takliflaringiz bo‘lsa, birga ishlaylik, shartnoma tuzaylik, degan gaplar bo‘lgan. Bu kimningdir “og‘zini moylash” emas, balki tizimni rivojlantirish uchun hamkorlik taklifi”, – deydi u.

Vazirlik yuristiga ko‘ra, vazirlik hech kimning tanqid qilishiga qarshi emas, biroq tanqid asosli va tekshirilgan bo‘lishi kerak.

Bakirov: “Mirzamahmudovning men bilan sudlashishdan boshqa ishi yo‘qmi?”

Otabek Bakirov sudga kelishidan oldin ham uyida chiroq o‘chganini aytdi.

“Bugun sud bo‘ladi deb chaqirilganiga kelgandik. Absurd, absurd narsa hammasi. Mana, nimani aytishim mumkin. Misol uchun, bugun ertalab ham svet yo‘q edi. Yozdim svet yo‘qligini. Endi mana shu svet yo‘qligini yozganim ham bundan buyog‘iga energetika vazirini obro‘sizlantirish bo‘ladimi, misol uchun? Har kuni svet yo‘q, har kuni o‘chadi. Bugun ertalabdan ham svet yo‘q edi. Bu haqda yozsa, hurmatli Mirzamahmudov, qayoqqa qarayapsiz, desa, Mirzamahmudovni obro‘sizlantirayotgan bo‘lyapmizmi? Yoki Mirzamahmudovning o‘rniga boshqa shaxs vazir bo‘lib qolsa, u ham obro‘sizlangan bo‘ladimi?

Kun tartibiga chiqarilayotgan masala menga tushunarsiz. Umuman tushunarsiz va buni paydar-pay, ya’ni xuddiki haligi energetika vazirining – shunday katta odamning qiladigan ishi yo‘qdek, ketma-ket ariza berishi tushunarsiz menga”.

U, shuningdek, bu ish ortida katta resurslar sarflanayotganini aytdi:

“Tasavvur qiling, Energetika vazirligining inson resurslarini, ma’muriy resurslarini, huquqiy resurslarini sarflayapti. Mana, ovozimni o‘chirish uchun-da. Gapirmasin, yozmasin, muammoni ko‘tarmasin deb. Endi tasavvur qiling, shuncha IIB xodimlari ovora, shuncha prokuratura ovora, sud ovora, ekspertiza ovora. To‘rt marta ekspertiza qilingan-da. Bir yil-u to‘rt oydan beri davom etyapti, beshinchi oyga ketyapti, bir yil-u besh oydan beri arava aylanyapti”.

Advokat: “Muddat o‘tgan bo‘lishi mumkin”

Bakirovning advokati Fayzulla Arslanovning aytishicha, ish materiallari sudga taqdim etilgan, biroq majlis sanasi hali aniq belgilanmagan. U ma’muriy javobgarlikka tortish muddati masalasiga e’tibor qaratdi.

“Qonunchilikka ko‘ra, ma’muriy javobgarlikka tortish muddati bir yilni tashkil qiladi. Bu holatda esa oradan 15 oy o‘tgan. Shu sababli ishni ko‘rib chiqishning o‘zi savol ostida”, – dedi advokat.

Sud sanasi noma’lum

Hozircha sud majlisining qachon davom etishi noma’lum. Tomonlarga qo‘shimcha ravishda xabar berilishi aytilgan.

Mazkur ish ijtimoiy tarmoqlarda keng muhokamalarga sabab bo‘lmoqda. Unda so‘z erkinligi, jamoatchilik nazorati va davlat organlari bilan ochiq muloqot masalalari yana bir bor kun tartibiga chiqdi.