Samarqand 2045 yilgacha ikki baravar kengayadi

Samarqand shahrining 2045 yilgacha bo‘lgan bosh rejasi loyihasiga ko‘ra, shahar hududi va aholisi qariyb ikki baravarga oshishi kutilmoqda. Yangi rejaga asosan, Samarqandning umumiy maydoni 11,2 ming gektardan 28,4 ming gektargacha kengayadi, aholi soni esa 1,2 million kishiga yetishi prognoz qilingan.

Hukumat qarori loyihasida Samarqandni kompleks rivojlantirish, shahar infratuzilmasini modernizatsiya qilish va qurilish ishlarini yagona bosh reja asosida amalga oshirish ko‘zda tutilgan. Hujjatga ko‘ra, barcha yangi qurilishlar master-reja va batafsil rejalashtirish loyihalari asosida tasdiqlanadi.

Bosh rejada shahar hududlari konservatsiya, rekonstruksiya va renovatsiya zonalariga ajratilmoqda. Konservatsiya hududlarida madaniy meros va yashil hududlar muhofaza qilinib, yangi qurilishlarga cheklov qo‘yiladi. Renovatsiya zonalarida esa eski va talabga javob bermaydigan binolar o‘rniga yangi majmualar qurilishiga ruxsat beriladi.

Loyihada transport infratuzilmasiga ham katta e’tibor qaratilgan. 2045 yilgacha Samarqandda qo‘shimcha 837 km yangi yo‘l qurish, 160 km mavjud yo‘lni kengaytirish va yangi tramvay tarmoqlarini barpo etish rejalashtirilgan. Shuningdek, jamoat transportidan foydalanish ulushini 60 foizgacha oshirish maqsad qilingan.

Ekologiya yo‘nalishida ham yirik o‘zgarishlar rejalashtirilgan. Bosh reja doirasida 11 ming gektar qo‘shimcha yashil maydon tashkil etish va shahar atrofida 18 ming gektarlik yashil belbog‘ barpo etish ko‘zda tutilgan. Natijada aholi jon boshiga to‘g‘ri keladigan yashil hudud hajmi 5 kvadrat metrdan 10 kvadrat metrgacha oshiriladi.

Shu bilan birga, Samarqandning YuNeSKO ro‘yxatiga kiritilgan tarixiy markazida shahar qiyofasiga ta’sir qiluvchi o‘zgarishlar xalqaro talablar asosida muvofiqlashtirilishi belgilangan.