Google xavfli kasalliklarga qarshi chivinlar yordamida kurashmoqchi

Google kompaniyasi jamoat salomatligi sohasidagi eng yirik loyihalaridan birini amalga oshirishga tayyorgarlik ko‘rmoqda. Loyiha doirasida xavfli infeksiyalarni tarqatuvchi chivinlar populyatsiyasini qisqartirish uchun maxsus tayyorlangan chivinlardan foydalanish ko‘zda tutilgan.

Tajriba dastlab AQShning Kaliforniya va Florida shtatlarida o‘tkazilishi rejalashtirilgan. Buning uchun kompaniya mamlakat Atrof-muhitni muhofaza qilish agentligidan maxsus ruxsat olish jarayonini boshlagan.

Tashabbusni Googleʼning bosh kompaniyasi Alphabet tarkibiga kiruvchi Verily kompaniyasi ilgari surmoqda. Rejaga ko‘ra, tabiatga 32 million dona erkak chivin qo‘yib yuboriladi. Ular volbaxiya bakteriyasi bilan zararlangan bo‘ladi.

Mutaxassislarning ta’kidlashicha, erkak chivinlar insonlarni chaqmaydi. Ular Culex turiga mansub urg‘ochi chivinlar bilan juftlashadi. Natijada tug‘iladigan avlod yashab qolmaydi va vaqt o‘tishi bilan xavfli kasalliklarni tarqatuvchi chivinlar soni kamayadi.

Loyihaning asosiy maqsadi denge, Zika virusi, chikungunya, sariq isitma hamda Sent-Luis ensefaliti kabi kasalliklarni tarqatuvchi chivinlarga qarshi kurashishdan iborat.

Kompaniya chivinlarni ko‘paytirish, saralash va tarqatish jarayonlarida sun’iy intellekt hamda robotlashtirilgan tizimlardan foydalanishni rejalashtirmoqda. Google vakillari bu usul dastur samaradorligini sezilarli darajada oshirishini ta’kidlamoqda.