Samarqand va Buxorodagi yirik ta’lim loyihasi: ZARMED universiteti nimasi bilan ajralib turadi?

Universitet tarkibidagi turli loyihalar va tashkilotlar esa talabalar uchun amaliyot bazasi vazifasini bajaradi. Bu esa turli yo‘nalishlarda tahsil olayotgan yoshlarning real ish jarayonlari bilan yaqindan tanishishiga xizmat qiladi.

Talaba uchun amaliy darslar

Universitet bilan tanishuv davomida jurnalist turizm yo‘nalishi talabalari bilan bir kunlik mashg‘ulotlarda ham ishtirok etdi. Dars auditoriyada emas, Samarqanddagi Registon maydonida amaliy mashg‘ulot shaklida tashkil etildi.

Mashg‘ulot davomida talabalar turizm iqtisodiyoti, turistlar bilan ishlash madaniyati, marshrutlarni shakllantirish va mamlakat imijini yaratishda gidlarning o‘rni haqida bilim oldilar. Shuningdek, xorijlik sayyohlar bilan muloqot qilish orqali nazariy bilimlarini amalda sinab ko‘rish imkoniyatiga ega bo‘ldilar.

Buxoro kampusi va grant dasturlari

ZARMED universitetining ilk kampusi bo‘lgan Buxoro filialida ham zamonaviy laboratoriyalar, anatomiya xonalari, kompyuter sinflari va sport infratuzilmasi faoliyat yuritadi. Universitet rahbariyati infratuzilmani rivojlantirish bilan bir qatorda talabalarni qo‘llab-quvvatlash dasturlariga ham e’tibor qaratayotganini ta’kidlaydi.

Ma’lumotlarga ko‘ra, o‘tgan o‘quv yilida 300 nafardan ortiq talabaga grant va stipendiyalar ajratilgan bo‘lib, buning uchun 2 milliard so‘mdan ortiq mablag‘ yo‘naltirilgan.

Professor-o‘qituvchilar salohiyati va talabalar hayoti

Bugungi kunda universitetning ikki kampusida 600 nafardan ortiq professor-o‘qituvchi faoliyat yuritmoqda. Universitet vakillarining qayd etishicha, ta’lim sifatini ta’minlash uchun tajribali mutaxassislarni jalb etishga alohida e’tibor qaratilgan.

Shuningdek, talabalar hayoti faqat auditoriyalar bilan cheklanib qolmaydi. Universitetda muntazam ravishda forumlar, fan olimpiadalari, ilmiy konferensiyalar va madaniy tadbirlar tashkil etiladi. Yaqinda Samarqand kampusida o‘tkazilgan xalqaro talabalar forumi ham shunday tashabbuslardan biri bo‘ldi.

Xulosa

Bir necha kunlik kuzatuv universitet faoliyati haqida yakuniy xulosa chiqarish uchun yetarli bo‘lmasligi mumkin. Bunday bahoni, avvalo, bitiruvchilar va ularning kelajakdagi natijalari beradi.

Shunga qaramay, bugungi kunda ZARMED universiteti zamonaviy infratuzilma yaratish, professor-o‘qituvchilar salohiyatini mustahkamlash, talabalarni qo‘llab-quvvatlash hamda amaliyotga yo‘naltirilgan ta’lim tizimini rivojlantirishga alohida e’tibor qaratayotgan oliy ta’lim muassasalaridan biri sifatida namoyon bo‘lmoqda.

Universitetning ta’lim yo‘nalishlari, qabul jarayonlari, grant va stipendiya dasturlari haqidagi batafsil ma’lumotlarni rasmiy manbalar orqali olish mumkin.

Muallif: Ibrohim Samadov
Operator: Ziyoddin Mammatjonov
Montaj ustasi: Boburmirzo Anvarov