AQShning ESPN telekanali 2026 yilgi mundial ishtirokchilarining uy va safar liboslarini o‘rganib, ularning reytingini tuzdi. O‘zbekiston milliy jamoasining oq rangli asosiy libosi 105 ta forma orasida 103-o‘rinda, ko‘k rangli safar formasi esa 84-o‘rinda qayd etildi.
Sport sohasida jahondagi eng nufuzli medialardan biri – ESPN futbol bo‘yicha 2026 yilgi jahon chempionati ishtirokchilarining ekipirovkalari dizayniga baho berib, mundial liboslari reytingini tuzdi.
Telekanal barcha 48 ta milliy jamoaning uy va safar liboslari, shuningdek, yana 9 ta jamoaning uchinchi darajali liboslarini ko‘rib chiqqan.
Reytingda O‘zbekiston milliy jamoasining 7Saber brendi tomonidan ishlab chiqilgan oq rangli asosiy formasi 105 ta forma orasida 103-o‘rinda, ko‘k rangli safar formasi esa 84-o‘rinda qayd etilgan.
“O‘zbekiston milliy jamoasining uy uchrashuvlari uchun mo‘ljallangan formasi asosan oq rangda ishlangan bo‘lib, unda to‘q ko‘k rangli nozik bezak chiziqlari qo‘llangan. Yo‘l-yo‘l yoqa qismida mamlakat bayrog‘i ranglari aks etgan. Matoda esa an’anaviy so‘zana kashtachiligi va to‘qimachilik san’atidan ilhomlangan mozaikasimon naqshlar joy olgan”, – deyiladi maqolada.
ESPN O‘zbekistonning asosiy formasiga qaraganda safar libosiga yuqoriroq baho berganini izohlarkan, matodagi so‘zana naqshlari va yoqa qismiga tushirilgan bayroq ranglari oqdan ko‘ra, ko‘k fonga ko‘proq mos tushganini qayd etgan.
Ma’lumot uchun, O‘zbekiston Futbol assotsiatsiyasi milliy jamoaning mundialdagi ilk ishtiroki munosabati bilan ekipirovka masalasida yirik xalqaro brendlar bilan hamkorlik masalasini ko‘rib chiqqani yoki yo‘qligi ma’lum emas. Assotsiatsiya 2025 yil 15 avgustdagi bayonotida O‘zbekiston terma jamoalari bundan buyon 7SABER brendi ishlab chiqqan liboslarda to‘p surishini e’lon qilgan.
7SABER brendiga 2019 yilda O‘zbekistonda asos solingan bo‘lib, 2021 yil iyun oyida Toshkentda rasman taqdim etilgan. 2020 va 2024 yillardagi olimpiadalarda O‘zbekiston terma jamoalari ayni shu brend liboslarida ishtirok etgan edi.
