Sud ekspertizasini o‘tkazishning yangi tartibi belgilandi

O‘zbekistonda sud ekspertizasini o‘tkazish tartibi va muddatlarini belgilaydigan yangi normalar joriy etildi. Unga ko‘ra, sud ekspertizasi odatda 30 kalendar kun ichida o‘tkazilishi, zarurat tug‘ilganda esa belgilangan tartibda muddati uzaytirilishi mumkin.

“Sud-ekspertlik faoliyati to‘g‘risida”gi qonunga muvofiq, sud ekspertizasini tayinlagan organ yoki mansabdor shaxs tadqiqotlarni o‘tkazish va xulosa tayyorlash uchun sud ekspertiga zarur bo‘lgan tadqiqot obektlari hamda ish materiallarini taqdim etadi.

Shuningdek, ekspertiza uchun zarur namunalar sud ekspertizasini tayinlagan organ (shaxs) tomonidan olinadi va protsessual qonunchilikda belgilangan tartibda ish materiallariga ilova qilinadi.

Qonunga ko‘ra, sud ekspertizasini o‘tkazishning umumiy muddati 30 kalendar kun etib belgilangan.

Agar ekspertizani mazkur muddatda yakunlash imkoni bo‘lmasa, sud eksperti yoki sud-ekspertiza muassasasi muddat tugashiga kamida 3 ish kuni qolganda bu haqda ekspertizani tayinlagan organ yoki shaxsni xabardor qilishi lozim. Shundan so‘ng ekspertiza muddati tomonlarning kelishuviga ko‘ra uzaytirilishi mumkin.

Tadqiqotlar yakunlanganidan keyin sud eksperti yoki sud ekspertlari komissiyasi xulosa tayyorlaydi. Komissiya tarkibidagi har bir sud eksperti ushbu xulosani shaxsan imzolashi shart.