Toshkentda fuqarodan ming dollar talab qilgan tuman gaz ta’minoti bo‘limi xodimi ushlandi

Toshkent shahrida fuqarodan hisoblagich yo‘qligi sababli ishlarini bosti-bosti qilib berish evaziga 1 000 AQSh dollari talab qilgan Yunusobod tumani gaz ta’minoti bo‘limi xodimi qo‘lga olindi.

Ma’lum qilinishicha, fuqaro Toshkent shahar IIBBga murojaat qilib, Yunusobod tumani gaz ta’minoti bo‘limida ishlovchi mas’ul shaxs gaz hisoblagich o‘rnatilmaganligi sababli dalolatnoma tuzmaslik, jarimaga tortmaslik va hujjatlarni to‘g‘rilab berish evaziga 12 mln so‘m talab qilayotganligi va shu kunga qadar 1 million 200 ming so‘m berganligini ma’lum qilib, mazkur shaxsga nisbatan qonuniy chora ko‘rishni so‘ragan.

O‘tkazilgan tezkor tadbir davomida Yunusobod tumani gaz ta’minoti bo‘limida ishlovchi mas’ul shaxs fuqarodan talab qilingan pulning qolgan 10 mln 800 ming so‘mini olgan vaqtida ushlangan.

Holat yuzasidan Jinoyat kodeksi 168-moddasi uchinchi qismi “v” bandi bilan jinoyat ishi qo‘zg‘atilgan.