Janubiy Koreyaning sobiq adliya vaziri 25 yilga qamaldi

Janubiy Koreyaning sobiq adliya vaziri Pak Son Je 2024 yil 3 dekabr voqealarida ishtirok etish va hokimiyatni suiiste’mol qilishda aybdor deb topildi.

Foto: Yonhap

Seul markaziy tuman sudi Janubiy Koreyaning sobiq adliya vaziri Pak Son Jeni 25 yilga ozodlikdan mahrum qildi. Bu haqda Yonhap agentligi xabar berdi.

2024 yil 3 dekabr voqealari tafsilotlarini tergov qilayotgan maxsus prokuratura sobiq prezident Yun Sok Yol harbiy holat e’lon qilganidan keyin Adliya vazirligining yuqori lavozimli mulozimlari ishtirokida yig‘ilish chaqirgani uchun Pak Son Jega nisbatan isyonda ishtirok etish va hokimiyatni suiiste’mol qilish ayblovlarini ilgari surgan edi.

Sud Maxsus prokuraturaning mazkur yig‘ilishda Yun Sok Yol buyrug‘i bilan hibsga olinishi rejalashtirilgan siyosatchilarni saqlash joylari muhokama qilingani haqidagi vajlarini inobatga olib, Pak Son Jeni har ikkala band bo‘yicha aybdor deb topdi.

«Sudlanuvchi isyon muvaffaqiyatli yakunlanishi mumkin deb hisoblab, unda ishtirok etishni afzal ko‘rdi va Konstitutsiyani himoya qilish bo‘yicha o‘z burchidan yuz o‘girdi», — deyiladi sud qarorida.