Venesueladagi zilzila: vayronalar ostidagilarni qutqarishga juda kam vaqt qolmoqda

Venesuelada 25 iyun kuni sodir bo‘lgan egizak zilzilalar oqibatida halok bo‘lganlar soni 1500 kishiga yaqinlashdi. Mamlakatning eng ko‘p zarar ko‘rgan La-Guayra shtatiga xorijiy qutqaruv guruhlari yetib kelmoqda.

Reutersʼning yozishicha, Karakasdan taxminan 40 km shimolda joylashgan ushbu shtatda o‘nlab binolar vayron bo‘lib, qum va vayronalar uyumiga aylangan.

«Qutqaruv va tiklash ishlari davom etmoqda. Bugun (yakshanba) biz odamlarni tiriklayin qutqardik, shuning uchun operatsiyalar to‘xtatilmaydi. Biz har doim umidni saqlab qolamiz», dedi muvaqqat prezident Delsi Rodriges. Shuningdek, u binolarning yashash uchun yaroqliligini aniqlaydigan prezident komissiyasi tuzilganini e’lon qildi.

Bir nechta vazirlari hamrohligida gapirgan Rodriges maktablarda darslar yana bir haftaga to‘xtatilishini va La-Guayrada elektr ta’minoti 75% gacha tiklanganini aytdi.

Avvalroq Milliy Assambleya raisi Xorxe Rodriges yakshanba kuni qurbonlar soni 20 kishiga ko‘payib, 1450 nafarga yetganini ma’lum qilgandi. Uning qo‘shimcha qilishicha, 3150 kishi jarohatlangan, 12 721 kishi uy-joyini tark etishga majbur bo‘lgan va 774 ta bino vayron bo‘lgan.

«Biz hayotlarni qutqarishni davom ettirish va uylaridan ayrilgan yoki qandaydir sabablarga ko‘ra o‘z turar joylariga qayta olmayotgan odamlar yashashi uchun lagerlar qurish uchun o‘ta og‘ir va hal qiluvchi soatlarni boshdan kechirmoqdamiz», dedi u.

2600 dan ortiq xorijiy qutqaruvchilar yetib kelguniga qadar mahalliy aholi va ko‘ngillilar kunlab vayronalar ostidan omon qolganlar va jasadlarni olib chiqdi. Ular ko‘pincha og‘ir texnika yetishmasligi va rasmiylarning kamligidan shikoyat qilishdi. Shu bilan birga yuzlab aftershoklar zararni yanada kuchaytirdi va aholini xavotirda ushlab turdi.

Shu dam olish kunlarida hukumat shanba oqshomiga qadar kamida 33 kishi, jumladan bir nechta bolalar qutqarilganini, biroq o‘n minglab odamlar hamon bedarak yo‘qolganlar ro‘yxatida qolayotganini ma’lum qildi.

Venesuela hukumati La-Guayraga yordam tashiyotgan fuqarolik ko‘ngillilariga minnatdorchilik bildirdi. Keyinchalik yo‘ldagi tirbandlik tez yordam mashinalarining samarali harakatlanishiga xalaqit berayotganini aytib, yo‘lga kirishni cheklab qo‘ydi.

Hukumat yuzlab odamlar bedarak yo‘qolgan yoki qolib ketgan degan raqamlarni keltirgan. Ammo mamlakat siyosiy muxolifati tomonidan targ‘ib qilinayotgan veb-saytda 50 mingga yaqin odam bedarak yo‘qolganlar ro‘yxatiga kiritilgan.

Vaqt kam

AQSh Geologiya xizmati 7.2 va 7.5 magnitudali zilzilalar oqibatida qurbonlar soni 10 000 dan oshishi mumkinligini taxmin qildi. Bu esa ushbu ofatni Lotin Amerikasida so‘nggi asrdagi eng ko‘p qurbon keltirgan zilzilalar sirasiga kiritadi.

«Taxminan uch kunlik, ya’ni 72 soatlik vaqt oralig‘i bor, shundan keyin odamlarni tirik qutqarish ehtimoli keskin kamayadi», dedi Shveytsariya qutqaruv guruhi rahbari Sebastyan Eugster.

Uning qo‘shimcha qilishicha, 80 kishidan iborat guruh sakkizta qidiruv itlarining yordami bilan vayronalar ostidan bir nechta omon qolganlarni topgan, biroq ularni hayotini saqlab qolish uchun o‘z vaqtida olib chiqishning imkoni bo‘lmagan. Shanba oqshomida zilzilalar sodir bo‘lganidan beri 72 soatdan ko‘proq vaqt o‘tdi.

AQSh Davlat departamenti amerikalik qutqaruvchilar vayronalar ostidan adyolga o‘ralgan va yig‘layotgan bolani olib chiqayotgani tasvirlangan videoni joylashtirdi.

Today, members of USA-01, working alongside local firefighters, rescued a mother & her nine-month-old baby from a collapsed structure. Both were found alive with only minor injuries, brought to safety to the cheers of neighbors.
This is our why: the delivery of hope.@StateDept pic.twitter.com/3ZmJWlN5oL

— VA-TF1 / USA-01 - Urban Search and Rescue (@VATF1) June 27, 2026

Kolumbiya qutqaruv guruhi ham skaner yordamida joyini aniqlagandan so‘ng, vayronalar ostida taxminan 3 metr chuqurlikda qolib ketgan 11 yoshli bolani qutqarib qoldi.

AQShning yuqori martabali mulozimi Tramp ma’muriyati allaqachon ajratgan 150 million dollarga qo‘shimcha ravishda, yaqin kunlarda yuzlab million dollarlik yangi moliyaviy yordam paketi e’lon qilinishi aytdi.