Toshkentda qurilishdagi avariyadan keyin kanalizatsiya suvi Salor kanaliga oqizildi

Toshkent shahrining Shota Rustaveli ko‘chasida qurilish ishlari davomida shikast yetkazilgan quvurdan chiqqan oqova suv Salor kanaliga oqizilgani aniqlandi. Bu haqda Toshkent shahar Ekologiya va iqlim o‘zgarishi bosh boshqarmasi xabar berdi.

Ma’lum qilinishicha, holat yuzasidan bosh boshqarma boshlig‘i A. Rasulov, laboratoriya mutaxassislari hamda Yakkasaroy tumani ekologiya nazorati inspeksiyasi davlat inspektorlari ishtirokida tezkor ishchi guruh tuzilib, voqea joyiga chiqib o‘rganilganda oqova suv Salor kanaliga to‘g‘ridan to‘g‘ri tashlash holati tasdiqlangan.

Holat yuzasidan boshqarma tahliliy laboratoriyasi mutaxassislari tomonidan kanal suvidan belgilangan tartibda namunalar olinib, laboratoriya tahliliga yuborilgan. Tahlil natijalari hamda o‘rganish yakunlariga ko‘ra, atrof-muhitni muhofaza qilish talablariga rioya etilmagani yuzasidan qonunchilikda belgilangan tartibda tegishli choralar ko‘riladi. Qo‘shimcha ma’lumotlar o‘rganish ishlari yakuniga ko‘ra taqdim etiladi.

Eslatib o‘tamiz, 3 iyul kuni Yakkasaroy tumanidagi qurilish obektida kanalizatsiya tarmog‘ida sodir bo‘lgan texnik nosozlik oqibatida diametri 1 800 mm bo‘lgan quvurga jiddiy shikast yetgandi. Natijada suv toshib, yer qoplamasi qisman cho‘kishi va o‘pirilishi ro‘y bergan.