Prezident Shavkat Mirziyoyev raqamlashtirish va telekommunikatsiya sohalari bo‘yicha taqdimot bilan tanishdi.
Davlat boshqaruvining yagona integratsiyalashgan platformasi
Taqdimotda aytilishicha, davlat boshqaruvida ma’lumotlar bazalari va axborot tizimlari turli idoralar kesimida tarqoq holda shakllangan, ularni tahlil qilish va qaror qabul qilish jarayonlarida yagona yondashuv yetishmayapti.
Shu bois, davlat boshqaruvining yagona integratsiyalashgan raqamli platformasini bosqichma-bosqich joriy etish taklif qilindi. Mazkur tizim orqali hudud iqtisodiyoti, investitsiya, ekologiya, xavfsizlik masalalari, aholini qiynayotgan muammolar, mahallalarning farovonlik darajasi, fazoviy ma’lumotlar, obektlar va xarita qatlamlari yagona platformada aks ettiriladi.
Platforma sun’iy intellekt texnologiyalari asosida ma’lumotlarni tahlil qilish, hududlar kesimida muammolarni barvaqt aniqlash, qarorlar ijrosini monitoring qilish, resurslarni to‘g‘ri yo‘naltirish va boshqaruv samaradorligini oshirish imkonini beradi.
Davlat rahbari joriy yilda ushbu raqamli boshqaruv tizimini poytaxtda, kelgusi yildan esa barcha hududlarda joriy qilish zarurligini ta’kidladi.
Tovar va xizmatlarni yagona milliy tasniflash tizimi
Taqdimotda tovar va xizmatlarni yagona milliy tasniflash tizimini ishga tushirish masalasi ham ko‘rib chiqildi.
Hozirda bojxona, soliq, statistika va boshqa idoralar turli tovar klassifikatorlaridan foydalanmoqda. Bu esa biznes xarajatlarining ortishi, hisobotlar aniqligi pasayishi va idoralararo ma’lumot almashinuvida qiyinchiliklarga sabab bo‘lmoqda.
Yagona milliy tasniflash tizimi joriy etilsa, tadbirkorlar uchun ortiqcha byurokratik jarayonlar qisqaradi, davlat idoralari o‘rtasida ma’lumot almashinuvi soddalashadi, statistik hisobotlarning aniqligi oshadi.
Milliy navigatsiya tizimi
Mas’ullar milliy navigatsiya tizimini yaratish taklifini ham ilgari surdi.
