Qoʻshimcha funksionallar
-
Tungi ko‘rinish
Bekobodda yangi metallurgiya majmuasi foydalanishga topshirildi
Bekobod shahrida O‘zbekiston metallurgiya kombinati huzuridagi yangi Quyuv-prokatlash majmuasi ishga tushirildi. Mamlakatda ilk bor issiq prokatlangan po‘lat listlar ishlab chiqariladigan mazkur majmua yiliga 1 million tonna mahsulot ishlab chiqarish quvvatiga ega bo‘lib, 1 200 ta yangi ish o‘rni yaratadi.
Prezident Shavkat Mirziyoyev Bekobod shahriga tashrifi doirasida O‘zbekiston metallurgiya kombinatida barpo etilgan Quyuv-prokatlash majmuasining tantanali ochilish marosimida ishtirok etdi. Davlat rahbari kombinat jamoasi, mehnat faxriylari va xorijiy hamkorlarni ushbu muhim voqea bilan tabrikladi.
Marosimda ta’kidlanganidek, so‘nggi yillarda mamlakatda kon-metallurgiya sanoatini zamonaviy texnologiyalar asosida rivojlantirishga qaratilgan keng ko‘lamli islohotlar amalga oshirilmoqda. O‘tgan o‘n yil davomida tarmoqqa qariyb 2 milliard dollar xorijiy investitsiya jalb qilinib, 31 ta yirik ishlab chiqarish quvvati foydalanishga topshirildi. Xususiy sektorning kengayishi natijasida sohada faoliyat yuritayotgan korxonalar soni 150 tadan oshdi.
Shu davr mobaynida mahalliy metall mahsulotlari ishlab chiqarish hajmi yillik 3 million tonnaga, uning qiymati esa 23 trillion so‘mga yetdi. Taqqoslash uchun, 2016 yilda tarmoqda 800 ming tonna yoki 1,5 trillion so‘mlik mahsulot ishlab chiqarilgan edi.
Yangi Quyuv-prokatlash majmuasi O‘zbekistonda issiq prokatlangan po‘lat listlar ishlab chiqarish bo‘yicha birinchi loyiha hisoblanadi. Uning ishga tushirilishi natijasida yiliga 8 trillion so‘mlik 1 million tonna issiq prokatlangan po‘lat list ishlab chiqariladi. Bu Toshkent va Samarqand metallurgiya zavodlarining prokat listlarga bo‘lgan ehtiyojini to‘liq qoplash imkonini beradi.
Prezident kelgusi yillarda kombinatni mahalliy xomashyo bilan ta’minlash ustuvor vazifa bo‘lishini ta’kidladi. Qayd etilishicha, mamlakat hududida 1,5 milliard tonna temir rudasi zaxirasi mavjud. Yaqin uch-to‘rt yilda «Tebinbuloq» konini ishga tushirish orqali yiliga 1 million tonna po‘lat ishlab chiqarish, «Surun-ota» konidagi ma’danlarni boyitish hisobiga esa har yili 600 ming tonna temir xomashyosi olish rejalashtirilgan.
Shuningdek, kombinat hududida «O‘zbekiston ekologik texnologiyalar sanoat parki» tashkil etiladi. Joriy yilning o‘zida ushbu parkda umumiy qiymati 70 million dollar bo‘lgan oltita investitsiya loyihasi boshlanadi. Ularning amalga oshirilishi natijasida yana 660 ta yuqori daromadli ish o‘rni yaratiladi.
Tashrif yakunida prezident ramziy tugmani bosib, Quyuv-prokatlash majmuasi faoliyatiga rasman start berdi hamda soha faxriylari, kombinat xodimlari va xorijiy hamkorlar bilan muloqot qildi.
