Giyohvandlik vositalari ustidan davlat nazorati kuchaytiriladi

Hukumatning 2026 yil 2 iyuldagi 359-son qarori bilan “Giyohvandlik vositalari va psixotrop moddalarni olib kirish, olib chiqish uchun sertifikat berish tartibi to‘g‘risida”gi nizom tasdiqlandi.

Mazkur nizom giyohvandlik vositalari va psixotrop moddalarni O‘zbekistonga olib kirish va mamlakatdan olib chiqishda ruxsat beruvchi hujjat — sertifikatni rasmiylashtirish tartibini belgilaydi. Uning asosiy maqsadi ushbu sohada davlat nazoratini kuchaytirish va qonunchilik talablariga rioya etilishini ta’minlashdan iborat.

Nizomga muvofiq, sertifikatdan faqat bir marta foydalanish mumkin bo‘lib, uning amal qilish muddati bir yil etib belgilangan.

Sertifikat olish uchun ariza beruvchida giyohvandlik vositalari muomalasi bilan bog‘liq faoliyatni amalga oshirish huquqini beruvchi litsenziya mavjud bo‘lishi, giyohvandlik vositalarini olib kirish va olib chiqishda qonunchilik talablariga qat’iy rioya qilinishi hamda taqdim etiladigan ma’lumotlarning ishonchliligi ta’minlangan bo‘lishi lozim.

Arizani ko‘rib chiqish va sertifikatni rasmiylashtirish uchun bazaviy hisoblash miqdorining 8 baravari miqdorida yig‘im undiriladi.

Farmatsevtika mahsulotlari xavfsizligi markazi arizalarni qabul qilingan kundan boshlab 30 ish kunidan kechiktirmasdan ko‘rib chiqadi hamda sertifikat beradi yoki uni berishni rad etish to‘g‘risida qaror qabul qiladi.

Shuningdek, berilgan sertifikatlar reyestri “Lisenziya” axborot tizimida elektron shaklda yuritiladi. Har bir sertifikatga oid ma’lumotlar ochiq bo‘lib, ulardan barcha foydalanishi mumkin.